समाचारहरू

जिल्लामा कारागार भवन नहुँदा कैदीबन्दीले सास्ती खेप्नु परेको छ ।

भवनको अभावमा खेल्न, भेटघाट गर्न, सरसफाई देखि अन्य सुबिधाहरु उपभोग गर्न समेत नपाएको कैदीबन्दीको गुनासो छ ।

कारागारको भवन नहुँदा जिल्ला प्रहरी कार्यालयमा हिरासतको लागि बनाइएका दुईवटा कोठामा सिमित भएर बस्नुपरेको गुनासो गर्दै बन्दी धनबहादुर शाहीले भन्नुभयो ‘बसाइका हिसाबले हामीलाई सुधार गृह नभएर यातना गृह जस्तो महसुस भएको छ ।’

साँघुरो ठाउँमा बस्नुपरेकोले आपसमा सरूवा रोगहरूको जोखिम भएको अर्का बन्दी हरिबहादुर  शाहीको भनाई छ ।
हाल हिरासतमा बिभिन्न मुद्धाका १ जना कैदी, ९ जना बन्दी र १० जना थुनुवा गरि जम्मा २० जना रहेका छन् ।

जिल्ला प्रहरी कार्यालय हुम्लाको हाता भित्रै भएको २ कोठाको हिरासत कक्षामा कैदी, बन्दि र थुनुवाहरुलाई कोचाकोच गरेर राख्न बाध्य भएको डिएसपी सुर्य प्रकास सुबेदीले बताउनु भयो ।

२०२५ सालदेखिको २५ जना क्षमताको कारागारको भवन भत्किएपछि नयाँ निर्माण नहँुदा यो समस्या आएको डिएसपी सुबेदीको भनाई छ ।

नयाँ निर्माण गरिएको जेलर कार्यालयको भवनको एउटा कोठा कैदी राख्ने व्यबस्था गरिएको भए यस्तो समस्या नहुने सुवेदीले थप्नु भयो ।

यस सन्दर्भमा निमित्त जेलर डवले रावतले कैदी बन्दीलाई समस्या भएको स्वीकार गर्दै भवनका लागि केन्द्रमा पहल गरेको तर सुनुवाई नभएको धारणा राख्नुभयो ।

प्रमुख जिल्ला अधिकारी चिरञ्जीवि गिरीले कैदीबन्दीको सहज रुपमा बस्ने व्यवस्थाका लागि आफूले केन्द्रमा पहल गरि रहेको प्रतिक्रिया दिनु भयो ।

नन्द सिंह