काठमाडौँमै १ सय ४१ मतदानस्थल सम्वेदनशील

  ०७४ मङ्सिर १५ गते

प्रतिनिधि सभा र प्रदेश सभाको मङ्सिर २१ गते हुने दोस्रो चरणको निर्वाचनमा सुरक्षाको दृष्टिले काठमाडौँका ३ सय २० मतदानस्थलमध्ये १ सय ४१ मतदानस्थल सम्वेदनशील रहेका छन् ।

सम्वेदनशील भनी पहिचान गरिएका मतदानस्थलमा निर्वाचन आयोग र काठमाडौँ जिल्ला सुरक्षा समितिले सुरक्षाको व्यवस्था कडा बनाउने जनाएको छ ।

जिल्ला प्रशासन कार्यालय काठमाडौँले ३ सय २० मतदानस्थलमा ७ सय ३१ मतदानकेन्द्र तोकेको जनाएको छ । जसमा १ सय ४१ मतदानस्थल सम्वेदनशील र १ सय ७९ मतदानस्थल समान्य रहेको प्रशासन कार्यालयले जनाएको छ । सबैभन्दा बढी थ्रेट गोकर्णेश्वर नगरपालिका, कागेश्वरी नगरपालिका र तारकेश्वर नगरपालिकामा रहेका छन् ।

काठमाडौँ जिल्ला सुरक्षा समितिका संयोजकसमेत रहेका प्रमुख जिल्ला अधिकारी केदारनाथ शर्माले सुरक्षा निकायसँग समन्वय गरेर सम्वेदनशील मतदानस्थलमा सुरक्षा व्यवस्था कडा बनाउने बताएका छन् ।

'सुरक्षा निकायसँग समन्वय गर्दै हरेक मतदानस्थलमा सुरक्षा व्यवस्था मिलाउनुका साथै सम्वेदनशील मानिएको मतदानस्थलमा सुरक्षा व्यवस्था थप शसक्त बनाउँछौँ ।'-शर्माले भने-'अरू मतदानस्थल भन्दा सम्वेदनशील मानिएका मतदानस्थलमा सुरक्षाकर्मीको परिचालन सङ्ख्यात्मक हिसाबमा बढी नै हुनेछ ।'

जिल्ला प्रशासन कार्यालयका अनुसार काठमाडौँ महानगरपालिकामा १ सय ५६ मतदानस्थल रहेका छन् । जसमा १ सय ५ मतदानस्थल सामान्य र ५१ मतदानस्थल सम्वेदनशील रहेका छन् ।

किर्तिपुर नगरपालिकामा २० मतदानस्थल रहेका छन् । यहाँ १३ मतदानस्थल सामान्य र सात मतदानस्थल सम्वेदनशील रहेका छन् । दक्षिणकाली नगरपालिकामा १५ मतदानस्थल रहेकामा नौ मतदानस्थल सामान्य र ६ मतदानस्थल सम्वेदनशील रहेका छन् ।

१३ मतदानस्थल रहेको कागेश्वरी नगरपालिकामा दुई मतदानस्थल सामान्य र ११ मतदानस्थल सम्वेदनशील रहेका छन् । यसैगरी १४ मतदानस्थल रहेको शङ्खरापुर नगरपालिकामा आठ सामान्य र ६ ओटा सम्वेदनशील रहेका छन् ।

गोकर्णेश्वर नगरपालिकामा १७ मतदानस्थल रहेका छन् । जसमा एक सामान्य र १६ मतदानस्थल सम्वेदनशील रहेका छन् । यसैगरी १९ मतदानस्थल रहेको बुढानिलकण्ठमा ११ मतदानस्थल सामान्य र आठ मतदानस्थल सम्वेदनशील रहेका छन् ।

यसैगरी टोखा नगरपालिकामा १५ मतदानस्थल रहेका छन् । यहाँ नौ मतदानस्थल सामान्य र ६ मतदानस्थल सम्वेदनशील रहेका छन् । तारकेश्वर नगरपालिकामा १४ मतदानस्थल रहेकामा दुई मतदानस्थल सामान्य र १२ मतदानस्थल सम्वेदनशील रहेका छन् ।

नागार्जुन नगरपालिकामा-१५ मतदानस्थल रहेका छन् । नौ मतदानस्थल सामान्य र ६ मतदानस्थल सम्वेदनशील रहेका छन् । यस्तै चन्द्रागिरी नगरपालिकामा २२ मतदानस्थल रहेकामा १० मतदानस्थल सामान्य र १२ मतदानस्थल सम्वेदनशील रहेको जिल्ला प्रशासन कार्यालय काठमडौँले जनाएको छ ।


सुभाष साह