काङ्ग्रेस र राजपाका कार्यकर्ताबिच भएको झडपमा एकको मृत्यू

  ०७४ असोज ५ गते

कटहरीया नपा-८ का ५० वर्षीय रामपुकार राय यादवको असोज ४ गते राति नेपाली काङ्गे्रसका कार्यकर्तासँग झडप हुँदा मृत्यू भएको छ ।

रौतहटको कटहरीया नगरपालिकमा भएको निर्वाचनको विषयमा नेपाली काङ्गे्रस र राजपाका कार्यकर्ताबिच राति वादविवाद हुँदा दुवै पक्षबिच झडप भएको थियो ।

झडपमा परी घाइते भएका यादवलाई उपचारका लागि कटहरीया स्वास्थ्य चौकीमा लैजाँदै गर्दा बाटोमा मृत्यू भएको इलाका प्रहरी कार्यालय गरुडाका इन्स्पेक्टर केशव रेग्मीले बताए ।

झडपमा संलग्न भएको आरोपमा प्रहरीले कटहरीया नपा-८ का नेपाली काङ्ग्रेस कार्यकर्ता ३० वर्षीय अनुठा यादव, १८ वर्षीय भुटा राययादव र २२ वर्षीय बैजु साहलाई गिरफ्तार गरी अनुसन्धान भइरहेको जिल्ला प्रहरी कार्यालय रौतहटका एसपी यज्ञविनोद पोखरेलले बताए ।

मृतक यादवको शव पोष्टमार्टमका लागि जिल्ला अस्पताल गौरमा राखिएको छ । मृतक राजपाका कार्यकर्ता हुन् ।


विपिन गौतम