कर्मचारी अभावका कारण सेवाग्राही समस्यामा

  ०७६ जेठ ३१ गते

गतसातादेखि कालिका गाउँपालिकामा वडा सचिव नभएपछि पञ्जिकरणको काम गर्न नागरिकलाई गाउँपालिका धाउनु पर्ने बाध्यता भएको छ ।

कालिका गाउँपालिका–१ राम्चेमा कार्यरत वडा सचिव ईमलेश गदी गतसाता कर्मचारी समायोजन भएपछि अन्यत्र गए । यहाँ स्थानीय तहमा समायोजन भएर आउने कर्मचारी नआएसम्म पञ्जिकरण सेवा प्रभावित हुने भएको छ ।

वडा सचिव सहित अन्य कर्मचारीको अभावले वडाबाट प्रदान हुने सेवा सुविधा प्रभावित भएको स्थानीय दावाफुर्पा तामाङले बताए । ‘यसअघि पनि सचिव विदा बस्दा समस्या भएको थियो ।’–उनले भने ।

कालिका गाउँपालिका–१ का लाक्पा तामाङ आफ्नो बच्चाको जन्मदर्ता गराउन जेठ ३० गते वडा कार्यालयमा जाँदा वडा सचिव रमाना लिएर पर्सा जिल्लाको बहुदरमाई नगरपालिका गएको र नयाँ वडा सचिव आएपछि जन्म दर्ता हुने जबाफ पाएको बताउँदै सेवा प्राप्तिका लागि अब वडाबाट गाउँपालिका धाउनु पर्ने बाध्याता रहेको उनले बताए ।

लोकसेवा आयोगसँग वडा कार्यालयहरूका लागि नौ र गाउँपालिकाको लागि १४ जना कर्मचारी माग गरिएकोमा कर्मचारी आउनै तीन-चार महिना लाग्ने कालिका गाउँपालिका प्रमुख प्रशासकीय अधिकृत शर्मिला न्यौपाने बताइन् ।

उनले वडा नं १ का वडा सचिव समायोजन पछि रमाना लिएर गएपछि यस्तो समस्या परेको बताउँदै गाउँपालिका पञ्जिकरण शाखाका ठाकुरप्रसाद अधिकारीले गाउँपालिकाबाट सो सेवा दिने र त्यस वडामा पञ्जिकरण बाहेकको काम पशु प्राविधिक राजेन्द्र अगस्तीले सम्हाल्ने  बताइन् ।

कालिका गाउँकालिका ३ र ४ का वडा सचिवको सङ्घीय सरकारमा समायोजन भएकोले अहिले रमाना नदिने गाउँपालिकाले जनाएको छ ।


हेमनाथ खतिवडा