कमलामाई नगर पालिकाद्वारा गिट्टी कुट्ने मजदुरका परिवारलाई राहत प्याकेज वितरण

  ०७६ चैत १८ गते

दैनिक ज्यालादारी गरी जीविकोपार्जन गर्ने मजदुरहरूको खाद्य सुरक्षाको अधिकारलाई मध्येनगर गर्दै राहतको प्याकेज दिने घोषणा गरेको कमलामाई नगरपालिकाले चैत १७ ग्वाङखोलामा गिट्टी कुट्ने मजदुरका परिवारलाई राहत वितरण गरेको छ ।

कमलामाई नगरपालिकाका मेयर खड्ग खत्री, प्रमुख प्रशासकीय अधिकृत पुरुषोत्तम सुवेदी र नगर प्रवक्ता कर्णबहादुर घिसिङले घरमै पुगेर राहत वितरण गनुभएको हो ।

उक्त प्याकेजमा १० देखि १५ दिनलाई पुग्ने गरि अत्यावश्यक खाद्य सामग्रीहरू चामल, दाल, आलु, नुन, चिनी, वेसार, तेललगायत राखिएको छ ।

बन्दाबन्दिको अवधिमा दैनिक ज्याला मजदुरी गरेर जीविकोपार्जन गर्ने कमलामाई नगरक्षेत्र भित्रका ३३ जनालाई चैत १७ गते राहत उपलब्ध गराईएको कमलामाई नगरपालिकाका सूचना अधिकारी सागरकुमार ढकालले बताउनु भयो ।

राहत प्याकेजले १० देखि १५ दिनसम्मको लागि पुग्ने अनुमान गरिएको छ । प्याकेजमा, चामल २० के जी, दाल ३ के जी, चिनी १ के जी, आलु २ के जी, बेसार ५० ग्राम, तेल १ लिटर र नुन १ के जी राखिएको छ ।

प्रति प्याकेज १ हजार ८ सय १० रुपियाँ बराबरको लागतको रहेको छ । नगरपालिकाले अन्य मजदुरहरूलाई पनि प्याकेज वितरण गरिने जनाएको छ । विशेषगरि दैनिक ज्याला मजदुरी गरि जीविका चलाउनहरूका लागि नगरपालिकाले उक्त प्याकेज ल्याएको जनाएको छ ।

लकडाउनका बेलामा कोही पनि भोकले मर्न पर्ने अवस्था नआओस भनेर उक्त प्याकेज ल्याइएको नगरपालिकाका मेयर खड्ग खत्रीले बताउनु भयो । कोरोना भाइरसको सङ्क्रमण हुनसक्ने भनि सरकारले गरेको लकडाउनका कारण मजदुरहरूले खान नपाएको गुनासो बढेपछि नगरपालिकाले उक्त अभियान सुरु गरेको हो । नगरपालिकाले नगरभित्रका सबै मजदुरहरूलाई राहत दिने जनाएको छ ।

पहिलो र दोस्रो चरणमा गरि नगरपालिकाले करिब ५ सय जनाको सूचि राहत दिनका लागि तयार गरेको छ भने विपन्न र मजदुरहरू पत्ता लगाउन जनप्रतिनिधिहरू, टोल विकास संस्थाहरूलाई परिचालन गरेको छ । नागरिकको खाद्य अधिकारलाई सम्बोधन गर्दै आफूहरूले यस्तो काम थालेको मेयर खत्रीले बताउनु भयो ।


बिमला पाण्डे