कमलरीलाई तत्काल उद्धार गर्न सरकारसँग माग

  दाङ । ०७३ असोज २० गते

पूर्व कमलरीहरूले दाङलगायत पश्चिम नेपालका पाँच जिल्लामा अझै पनि २ सय ९५ जना बालिका दासका रूपमा कमलरी बस्न बाध्य भएको उल्लेख गर्दै तत्काल उद्धारका लागि असोज २० गते सरकारसँग माग गरेका छन् ।

 

पूर्व कमलरीहरूको सङ्गठन मुक्त कमलरी विकास मञ्चको दोस्रो राष्ट्रिय अधिवेशनले दाङ घोषणापत्र जारी गर्दै लुकिछिपी राखिएका कमलरीहरूको छिटो भन्दा छिटो उद्धार गर्न माग गरेको हो ।

 

घोराहीमा पत्रकार सम्मेलन गरी पूर्व कमलरीहरूले देशलाई नै कमलरी मुक्त घोषणा गर्दापनि पश्चिम नेपालका थारू समुदायका बालिकाहरूलाई दासका रूपमा श्रममा लगाइराख्नु दुखद पक्ष भएको भन्दै तत्काल उद्धारका लागि पहल गरिदिन सरकारसँग माग गरेका हुन् ।

 

मञ्चका अनुसार अहिले पनि दाङ, बाँके, बर्दिया, कैलाली र कञ्चनपुर जिल्लामा २ सय ९५ बालिका दासका रूपमा जमिन्दारको घरमा काम गरिरहेका छन् । दाङमा १७ जना, बाँकेमा १४ जना, बर्दियामा सबैभन्दा धेरै १ सय ७४ जना, कैलालीमा ७० जना र कञ्चनपुरमा २१ जना बालिका कमलरी बस्न बाध्य भएको मुक्त कमलरी विकास मञ्चकी केन्द्रीय अध्यक्ष सुनिता चौधरीले जानकारी दिइन् ।

 

मञ्चका अनुसार सरकारी कर्मचारी, शिक्षक, सामाजिक सङ्घसंस्थाका व्यक्तिले बालिकाहरूलाई कमलरी राखेका छन् । सरकारले ०७० असार १३ गते नेपाललाई कमलरी मुक्त राष्ट्र घोषणा गरी बालबालिकालाई दासदासीका रूपमा श्रममा लगाउन नपाइने व्यवस्था गरेको थियो ।

 

कानुनको उल्लङ्घन गर्नेलाई कडा कारबाहीको मागगर्दै कमलरीहरूलाई तत्काल उद्धारको प्रयास नगरे पुनः आन्दोलनमा उत्रने मुक्त कमलरी विकास मञ्चकी निवर्तमान केन्द्रीय अध्यक्ष विमला चौधरीले बताइन् ।

 

पूर्व कमलरीको नयाँ नेतृत्व चयन

यसैबीच असोज १९ र २० गते दाङ्को घोराहीमा भएको मुक्त कमलरी विकास मञ्चको केन्द्रीय अधिवेशनले दाङकी पूर्व कमलरी सुनिता चौधरीको अध्यक्षतामा ११ सदस्यीय नयाँ कार्यसमिति चयन गरेको छ । उपाध्यक्षमा बाँकेकी दिलकुमारी चौधरी, सचिवमा कैलालीकी सुजाता चौधरी र कोषाध्यक्षमा दाङकी विष्णु चौधरी चयन भएका छन् । त्यसैगरी सदस्यहरूमा सृजना चौधरी, निरू चौधरी दाङ, नम्रता चौधरी कैलाली, इश्वरी चौधरी कञ्चनपुर, अनिषा थारू र गिता थारू बर्दिया र सविता थारू बाँके छन् ।

photo20161006dang


जे.एन.सागर