समाचारहरू

कर्जन्हा नपा-३ की ८५ वर्षीया सुदामादेवी साहलाई कथित बोक्सी भन्दै कुटपिट गरेको आरोपमा इलाका प्रहरी कार्यालय मिर्चैयाले ४५ वर्षीय छोरा रामअवतार साह सोनारलाई कात्तिक १३ गते गिरफ्तार गरेको छ ।

केही दिनदेखि आरोपित रामअवतारको बुहारी मनिषा बिरामी भएको र आमा सुदामालाई ‘ठिक पारी देउ’ भन्दै कात्तिक ११ गते लछारपछार गरी कुटपिट गरेको पीडित सुदामाकी छोरी जानकीले इन्सेक प्रतिनिधिलाई बताउनु भयो ।

उहाँले भन्नुभयो–‘आमालाई कुटपिट गरी अभक्ष पनि कोच्याउने प्रयास गरेको थियो तर स्थानीयहरूको हस्तक्षेपले त्यसो हुन पाएन ।’

तत्कालै घटनाको जानकारी पाएपछि उपचारका लागि जनकपुरस्थित धनुषा अस्पतालमा लगिएको भए पनि डाक्टरहरूले बाँच्ने आश नभएको बताएकाले कात्तिक १३ गते घर नै लिएर आएको पीडितकी छोरी जानकीले बताउनु भयो ।

घटनाको जानकारी हुनासाथ आरोपितलाई गिरफ्तार गरे पनि उजुरी नआएकोले पीडित पक्षलाई उजुरी ल्याउन भनेकाले उजुरी आउने बितिकै कानुनी प्रक्रिया अगाडि बढाउने इलाका प्रहरी कार्यालय मिर्चैयाका डिएसपी सन्तुलालप्रसाद जैसवारले बताउनु भयो ।

इन्सेक, मानव अधिकार संरक्षण केन्द्र सञ्जाल, ओरेक र मुक्ति नेपाललगायत सङ्घसंस्थाका प्रतिनिधिहरूले कात्तिक १४ गते घटनाको अनुगमन गरेका छन् ।

दुर्गा परियार