कथित बोक्सी भन्दै कुटपिट घटनाका आरोपितविरूद्ध प्रहरीमा उजुरी

  ०७६ जेठ ७ गते

तिलाठी कोइलाडी गाउँपालिका–८ की ४५ वर्षीय झालो देवी खङ्गलाई काका ससुरा नाताका ६४ वर्षीय लक्ष्मी खङ्ग, उनका ४८ वर्षीय छोरा बलराम खङ्ग र बलरामकी ४५ वर्षीया पत्नी सुवधीदेवी खङ्गले कथित वोक्सीको आरोपमा दुर्व्यवहार गर्दै कुटपिट गरेको भन्दै पीडितले जिल्ला प्रहरी कार्यालयमा जेठ ५ गते उजुरी दिएकी छिन् ।

पति र छोराछोरी दिदीको घरमा आयोजित पूजाका लागि गएको बेला एक्लै भएको मौका पारी जेठ ४ गते राति आरोपितहरुले कुटपिट गरी घाइते बनाएको पीडितले बताइन् ।

आरोपितहरुको घरमा कोही बिरामी परे वा समस्या आएमा सो को दोष लगाउँदै आरोपितहरूले मुक्का र लाठीले कुटपिट र दुर्व्यवहार गर्ने गरेको पीडितले बताइन् ।

यसबारे गाउँमा यसअघि पटकपटक छलफल हुँदा आरोपितहरूले कथित बोक्सीको आरोपमा दुव्र्यवहार नगर्ने प्रतिबद्धता जनाएपनि पुनः दुर्व्यवहार गरेकाले आवश्यक कारवाही गर्न पीडितले माग गरेकी छिन् ।

कुटपिटबाट घाइते भएकी पीडित महिलाको राजविराजस्थित गजेन्द्रनारायण सिंह अस्पतालमा उपचार हुन नसकेपछि चिकित्सकहरूले धरान रेफर गरेका छन् ।

कुटपिटबाट शरीरको विभिन्न भागमा चोटपटक लागेकी पीडितको घाँटी बाङ्गिएकोले थप उपचारका लागि धरान रेफर गरिएको अस्पतालले जनाएको छ ।


मनोहरकुमार पोखरेल