कथित बोक्सीको आरोपमा शिक्षिका माथि धारिलो हतियार प्रहार

  ०७६ कात्तिक २८ गते

कथित बोक्सीको आरोप लगाउँदै स्थानीयले धारिलो हतियार प्रहार गर्दा मालिका गाउँपालिका–२, बिलबाङ रुमकी ४१ वर्षीय इन्द्र पुन घाइते भएकी छन् ।

पुनलाई कात्तिक २७ गते बिहान उनकै छिमेकी २८ वर्षीय रमेश पुनले बिहान पौने १० बजे कथित बोक्सीको आरोपमा धारिलो हतियार प्रहार गरेको पीडित पक्षको आरोप छ ।

आरोपितलाई इलाका प्रहरी कार्यालय दरबाङको टोलीले निस्कोट र रुम बीचको जङ्गलबाट गिरफ्तार गरेको इन्स्पेक्टर रामप्रसाद पाण्डेले जानकारी दिए ।

स्थानीय राष्ट्रिय आधारभूत विद्यालयकी प्रधानाध्यापक समेत रहेकी इन्द्रमाथि बिहान विद्यालय जाँदै गरेको समयमा एक्कासी आक्रमण भएको मालिका गाउँपालिकाकी उपाध्यक्ष खरमाया बिटालुले बताइन् । घटनामा पुनको टाउको, घाँटी तथा हातमा चोट लागेको उपाध्यक्ष बिटालुले बताइन् ।

उपाध्यक्ष बिटालुका अनुसार प्रहरीले गिरफ्तार गरेपछि रमेशले शिक्षिका पुनले आफूलाई बोक्सी लागेर सताएकोले आक्रमण गरेको स्थानीयसँग बताएका थिए ।

जिल्ला प्रहरी कार्यालय, म्याग्दीका इन्स्पेक्टर ध्रुव शर्माले घटनाको जानकारी प्राप्त हुनासाथ प्रहरी टोली खटिएको र मालिका गाउँपालिकाको समन्वयमा हेलिकोप्टरमार्फत् कात्तिक २७ गते नै पोखरा पुर्‍याएर मणिपाल शिक्षण अस्पतालमा उपचार भइरहेको जानकारी दिए ।


अमृत बास्कुने