समाचारहरू

मिर्चैया नपा–९ की ५९ वर्षीया बासु चौधरीलाई कथित बोक्सीको आरोप लगाई कुटपिट गरेको आरोपमा प्रहरीले सोही ठाउँका ४५ वर्षीय जतन चौधरीलाई पुस २७ गते गिरफ्तार गरेको छ ।

स्थानीय बिसुनदेव चौधरीको हृदयघातले मृत्यु भएपछि पुस २४ गते आरोपितलगायत ४० वर्षीया हरिहर चौधरी, २८ वर्षीय अजित चौधरी, ३५ वर्षीय किसुन चौधरी र ४५ वर्षीया इन्दुला चौधरीले ‘बोक्सी’ लगाएर मारेको भन्दै कुटपिट गरी गाउँ निकाला गरेको पीडित बासु चौधरीको आरोप छ ।

प्रहरी तथा स्थानीयले उद्धार गरी सुरक्षित स्थानमा राखेकाले ज्यान जोगिएको भन्दै आरोपितहरूविरुद्ध इलाका प्रहरी कार्यालय मिर्चैयामा पुस २५ गते उजुरी दिएको पीडितले बताउनु भयो ।

घटनाको जानकारी हुनासाथ एक जना आरोपितलाई गिरफ्तार गरेको र अन्य फरार रहेकाले खोजतलास जारी राखेको इलाका प्रहरी कार्यालय मिर्चैयाका डिएसपी सन्तुलाल प्रसाद जैसवारले बताउनु भयो ।

दुर्गा परियार