कथित बोक्सीको आरोपमा कुटपिट घटनामा संलग्न आरोपित गिरफ्तार

  ०७५ पुस १४ गते

वीरेन्द्रनगर नपा–२ की १८ वर्षीया बालिका अमृता बुढालाई कथित बोक्सीको आरोपमा कुटपिट गरेको भन्दै विरेन्द्रनगर नपा–७ का ३० वर्षीय कृष्णप्रसाद काफ्ले र उनकी पत्नी २७ वर्षीया कृष्णा काप्फ्लेलाई प्रहरीले गिरफ्तार गरेको छ ।

अमृताकी सानीआमा कृष्णा काफ्लेकी दुई वर्षीया छोरीमाथि कथित बोक्सी लागेको भन्दै आमा टीका बुढाकै अगाडि पुस ८ गते कृष्णाले मसान चढेको निहुँमा काम्दै तातो पन्युले शरीरभरी डामेको घटनालाई लुकाउन खोजेको जानकारीपछि प्रहरीले उनीहरुलाई पुस १३ गते घरबाटै गिरफ्तार गरेको हो ।

कृष्णा काफ्लेको घरमा बस्दै आएकी अमृतालाई कुटपिट गरिएको घटनालाई आफन्तको भनी झण्डै एकसाता सम्म गुपचुप राखिएको प्रहरीले जनाएको छ ।

प्रहरीको अनुसार पन्युले डाम्दा अमृताको मुख, अनुहार, गोडा र ढाड पोलिएको छ । पन्युले डामेको घाउ गम्भीर बन्दै गएपछि उनका बुबा लुन बुढाले कर्णाली प्रदेश अस्पताल सुर्खेतमा दुईदिन पछि मात्र उपचार गर्न लगेका थिए । अमृता उपचारपछि पुस १३ गते घरमा फर्किएपनि हिँडडुल गर्ने अवस्थामा छैनन् ।

आफन्त बीचको घटना भन्दै घरभित्रै मिलाउने तथा घटना गुपचुप राख्न खोजेकोप्रति अमृता चिन्तित छिन् । अमृता भन्छिन–‘म माथि अत्याचार भएको छ म न्याय चाहान्छु ।’

आमाकै अगाडि तातो पन्युले डाम्ने सानी कृष्णालाई कानुन बमोजिम कारवाही गरिनुपर्ने अमृताले बताइन् ।

यसबारेमा जिल्ला प्रहरी कार्यालय सुर्खेतका डिएसपी प्रदीपबहादुर क्षेत्रीले आरोपितहरूलाई हिरासतामा राखी आवश्यक अनुसन्धान भइरहेको, आफन्त बीचको घटनालाई लुकाउन नमिल्ने र दोषीलाई कानुनी कारवाहीको दायरामा ल्याएरै छोडने बताए ।


दुर्गा थापा