कथित बोक्सीको आरोपमा अमानवीय व्यवहार गरेको घटनाका आरोपित गिरफ्तार

  ०७३ असोज ४ गते

हनुमाननगर योगिनियामाई नपा-९ इनर्वाकी ५० वर्षीया मन्जुदेवी देवलाई कथित बोक्सीको आरोपमा अमानवीयय व्यवहार गरेको आरोपमा प्रहरीले सोही ठाउँका ४३ वर्षीय परमानन्द मण्डल र उनका भाइ ३५ वर्षीय प्रमोद मण्डललाई असोज ४ गते गिरफ्तार गरेको छ ।

सप्तरी जिल्ला अदालतबाट खटिएको विशेष अभियान टोलीले कैद सजाय पाई फरार रहेका आरोपितहरूलाई गिरफ्तार गरेर राजविराज कारागारमा पठाइएको अदालतका तहसिलदार किरण कुमार सिंहले जानकारी दिए ।

जिल्ला अदालतका तत्कालीन न्यायाधीश रितेन्द्र थापाले आरोपितहरूलाई ०६९ माघ ९ गते जनही ६ महिना कैद र ७ हजार ५ सय जरिबानाको फैसला गरेको थियो । यसैगरी पुनरावेदन अदालतका तत्कालीन न्यायाधीशद्वय मुहम्मद साबिर हुसेन र नन्दलाल महतोको संयुक्त इजलासले ०७२ चैत ९ गते जिल्ला अदालतको सो फैसला सदर गरेको थियो ।

पीडितलाई आरोपितहरूसहित सात जनाले ०६८ असोज १२ गते घरमा एक्लै भएको बेला गाउँका बस्तु, बालबालिकाहरूलाई 'बोक्सी मन्त्र' लगाई बिरामी पारेको भन्दै कुटपिट गर्नुका साथै मलमुत्र खुवाउने प्रयास गरेको आरोप लागेको थियो । पीडितले जिल्ला प्रहरी कार्यालयमा ०६८ असोज २४ गते उजुरी दिएकी थिइन् ।

अन्य आरोपितहरू हनुमाननगर योगिनियामाई नपा-९ इनर्वाका ७० वर्षीय रामेश्वर मण्डल, ४५ वर्षीय जुगती मण्डल, ४२ वर्षीय राजाराम मण्डल, ४१ वर्षीय ब्रहृमदेव मण्डल र ४० वर्षीय दिपक भनिने विपत मण्डल फरार रहेको प्रहरीले जनाएको छ ।


मनोहरकुमार पोखरेल