एम्बुस विष्फोटनमा उम्मेदवार घाइते, घाइतेलाई थप उपचारका लागि काठमाडौँ लाने तयारी

  ०७४ मङ्सिर १३ गते

नेपाली काङ्ग्रेस उदयपुरका उम्मेदवार नारायण कार्कीलाई लक्षित गरी अज्ञात समूहले मङ्सिर १३ गते बिहान थापेको एम्बुस पडकँदा उम्मेदवारसहित चार जना घाइते भएका छन् ।

उदयपुरगढी गाउँपालिका-६ नेपालटार बजारमा आयोजना गरिएको चुनावीसभालाई सम्बोधन गर्न जाँदै गरेका प्रतिनिधिसभा निर्वाचन क्षेत्र-२ का काङ्ग्रेसका उम्मेदवार कार्कीलाई लक्षित गरी सोही वडाको दनुवारबेसीमा थापिएको एम्बुस विष्फोट भएको हो ।

विष्फोटनमा परी उम्मेदवार कार्की, उदयश्री वहुमूखी क्याम्पस कटारीका नेविसङ्घका सभापति मीरा कटुवाल, नाम नखुलेका चालक र अन्य एक कार्यकर्ता घाइते भएको प्रमुख जिल्ला अधिकारी चन्द्रमान श्रेष्ठले बताए ।

उनका अनुसार घाइतको अवस्था गम्भीर रहेकाले उपचारका लागि हेलिकप्टर मगाइएको छ । कार्कीको एउटा हात चलेको छैन भने कटुवालको पैतलामा चोट लगोको जनाइएको छ ।

घटनास्थल सदरमुकाम गाईघाटदेखि ४५ किलोमिटर पश्चिम क्षेत्रमा रहेकाले घटनास्थलतर्फ भर्खरै प्रहरी परिचालन भएकाले पुगेपछि मात्र विस्तृत विवरण आउने प्रहरीले जनाएको छ ।

मङ्सिर १२ गते मात्र नेपाली काङ्ग्रेस प्रतिनिधिसभा निर्वचन क्षेत्र-१ का उम्मेदवार डा. नारायण खड्का र सोही क्षेत्रको प्रदेससभा-२ का काङ्ग्रेसका उम्मेदवार हिमाल कार्कीलाई लक्षित गरी अज्ञात समूहले बम विष्फोटन गराएको थियो ।


भरत खड्का