एमाले कार्यकर्तामाथि कुटपिट

  ०७४ वैशाख २७ गते

दुधौली नगरपालिका-४ दुधौलीमा नेकपा एमालेका दुई जना कार्यकर्तालाई नेकपा माओवादी केन्द्रका कार्यकर्ताले घरमै गएर कुटपिट गरेको जिल्ला प्रहरी कार्यालय सिन्धुलीले जनाएको छ ।

कुटपिटबाट दुधौली नगरपालिका-४ डकाहा निवासी एमाले कार्यकर्ता रुपक खड्का र रुपा खड्का घाइते भएका छन् ।

नेकपा माओवादी केन्द्रका जिल्ला इञ्चार्ज विषमलाल अधिकारी दनुवारका छोरा रोशन अधिकारी दनुवारले वैशाख २६ गते साँझ स्थानीय तह निर्वाचनको विषयलाई लिएर कुटपिट गरेको जिल्ला प्रहरी कार्यालयका एसपी उमाशङ्कर पञ्जियारले बताए । घटनामा संलग्नलाई खोजी गरिएको प्रहरीले जनाएको छ ।

उनीहरूको प्रारम्भिक उपचार स्थानीय स्वास्थ्य संस्थामा गरिएको र गम्भीर घाइते भएका कारण थप उपचारका लागि काठमाडौँ लगिने नेकपा एमाले सिन्धुलीका उपसचिव महेन्द्रदेव श्रेष्ठले बताए ।


बिमला पाण्डे