उम्मेदवारमाथि खुकुरी प्रहार गर्नेलाई कारबाहीको माग

  ०७४ असार ८ गते

राप्रपा सुनसरीले असार ८ गते इटहरीमा पत्रकार सम्मेलन गरी आफ्ना उम्मेदवारमाथि खुकुरी प्रहार गर्नेलाई कडा कारबाही गर्न माग गरेको छ ।

पत्रकार सम्मेलनमा राप्रपा सुनसरीका अध्यक्ष रोहित कार्कीले स्थानीय तहको निर्वाचनमा इटहरी उपमहानगरपालिका-९ बाट वडा अध्यक्ष पदका आफ्ना उम्मेदवार ३५ वर्षीय श्याम पोखरेल र सदस्य पदका उम्मेदवार ३८ वर्षीय खड्गकुमार श्रेष्ठमाथि ६ गते राति खुकुरी प्रहार भएको जनाउँदै आक्रमण गर्नेलाई कारबाही गर्न माग गरेका हुन् ।

कार्कीले डरत्रास देखाउन आफ्ना उम्मेदवारमाथि आक्रमण गरिएको हुनसक्ने जनाउँदै राज्यले शान्ति सुरक्षाको जिम्मेवारी बहन गर्न नसकेको आरोप लगाए ।

अपरिचित तीन जनाको समूहले उम्मेदवारद्वयलाई इटहरी विराटनगर सडकखण्डस्थित त्रिवेणी कलेज अगाडि खुकुरीले प्रहार गरेर भागेका थिए ।

खुकुरीले प्रहार गर्दा उम्मेदवार तर्किएर पछि हटेका कारण गम्भीर चोट नलागेको पीडित पक्षले बताए ।

इलाका प्रहरी कार्यालय इटहरीका डिएसपी नरेशराज सुवेदीले आरोपित समूहको पहिचान नखुलिसकेको तर अनुसन्धान भने जारी रहेको बताए ।


शेखर ढकाल