समाचारहरू

उपल्लो डोल्पामा पर्ने डोल्पोवुद्ध, छार्काताङसोङ र शे फोक्सुण्डो गाउँपालिकामा पर्ने फोक्सुण्डो स्वास्थ्य चौकी, धो स्वास्थ्य चौकी र छार्का स्वास्थ्य चौकी, निजाल स्वास्थ्य चौकीमा मङ्सिर पहिलो सातादेखि औषधि अभाव भएको स्थानीयले गुनासो गरेका छन् ।

जाडो बढेकोले चिकित्सकहरू समेत सदरमुकाम तर्फ फर्केकोले स्वास्थ्य चौकीहरू रित्ता भएको पारासिटामोल, जीवनजल सम्म नभएको शे फोक्सुण्डो गाउँपालिका –८ रिग्मोका पेम्बा छेवाङ्ग गुरूङ्गले बताउनु भयो ।

शे फोक्सुण्डो गाउँपालिका–१ र ८ मा पर्ने साल्दाङ्ग स्थित निजालमा रहेको स्वास्थ्य चौकी र फोक्सुण्डो स्वास्थ्य चौकीमा औषधि अभाव भएको फोक्सुण्डो स्वास्थ्य चौकी इन्चार्ज नवराज महताराले जानकारी दिनुभयो । औषधि सकिएकोबारे आफूले गाउँपालिका अध्यक्ष टसिटुण्डुप गुरूङ्गलाई जानकारी गराई सकिएको भएपनि अहिले सम्म नपुगेको महताराको भनाई छ ।

सदरमुकाम देखि चार दिनको पैदल दुरीमा पर्ने सालदाङ्ग स्थित निजाल स्वास्थ्य चौकीमा औषधि अभाव भएपछि तत्काल खरिद गरेर पठाइसकेको तर जाडोका कारण जनप्रतिनिधि देखि कर्मचारी समेत काठमाण्डौंमै भएकाले सम्बन्धित ठाउँमा पुग्न समस्या भएको से फोक्सुण्डो गाउँपालिका अध्यक्ष टसिटुण्डुप गुरुङ्गले जानकारी दिनुभयो ।

जिल्ला स्वास्थ्य सेवा कार्यालयका प्रमुख डाक्टर सिजन रावलले स्थानीय तहका स्वास्थ्य संस्थाहरूमा औषधि खरिद देखि कर्मचारी व्यवस्थापन सम्मको काम स्थानीय तहले नै गर्ने र बजेट पनि त्यहिँ भएको बताउँदै आकस्मिक रूपमा मात्र जिल्ला स्वास्थ्य सेवा कार्यालयले औषधी उपलब्ध गराउने जिकिर गर्नुभयो ।

विष्णुप्रसाद देवकोटा