उपप्रधानमन्त्री एवम् ऊर्जामन्त्री कमल थापासँग स्पष्टीकरण माग

  ०७४ मङ्सिर ८ गते

निर्वाचन आयोगले उपप्रधानमन्त्री एवम् ऊर्जामन्त्री कमल थापालाई २४ घण्टाभित्र स्पष्टीकरण पेश गर्न मङ्सिर ८ गते निर्देशन दिएको छ ।

निर्वाचन आचारसंहिता केन्द्रीय अनुगमन समितिले निर्वाचन आचारसंहिता विपरीत मौन अवधिमा राष्ट्रिय प्रजातन्त्र पार्टीका अध्यक्षसमेत रहेका उपप्रधानमन्त्री थापाले आफ्नो पार्टीको पक्षमा मत मागेकाले स्पष्टीकरण सोधिएको आयोगका सहसचिव एवम् प्रवक्ता नवराज ढकालले बताए ।

'आगामी मङ्सिर १० गते हुन गइरहेको पहिलो चरणको निर्वाचनको सन्दर्भमा यही मङ्सिर ७ गते राति १२ बजेदेखि मौन अवधि सुरू भइसकेको अवस्थामा माननीयज्यूले सामाजिक सञ्जाल ट्वीटरमार्फत आफ्नो पार्टीको पक्षमा मत मागेको सूचना निर्वाचन आयोगमा प्राप्त हुन आएको छ ।'-आयोगले थापालाई लेखेको स्पष्टीकरण पत्रमा उल्लेख गरिएको छ-'उक्त कार्य निर्वाचन आचारसंहिता, २०७२ को दफा ५ को खण्ड (घ) को उपखण्ड (१) विपरीत देखिएको हुँदा यहाँलाई निर्वाचन आचारसंहिता उल्लङ्घन गरेबापत कारबाही हुनुपर्ने हो/होइन ? पत्र प्राप्त भएको मितिले २४ घण्टाभित्र स्पष्टीकरण पेश गर्नु हुन निर्वाचन आचारसंहिता केन्द्रीय अनुगमन समितिको मिति २०७४/८/८ को निर्णय अनुसार अनुरोध छ ।'


सुभाष साह