उपचारको क्रममा एकजना थुनुवाको मृत्यु

  ०७६ असार १८ गते

जिल्ला कारागार गुलरियामा थुनामा रहेका भारत मोतिपुरथाना नानपारा ग्राम, सलारपुरका २५ वर्षीय राहुल राजभारको असार १७ गते उपचारको क्रममा नेपालगञ्जस्थित भेरी अस्पतालमा मृत्यु भएको कारगार प्रशासनले जनाएको छ ।

राहुललाई असार १६ गते स्वास्थ्यमा समस्या देखिएपछि स्वास्थ्यकर्मीले कारागारमा चेक जाँच गरी थप उपचारको लागि जिल्ला अस्पताल गुलरियामा पठाएको थियो ।

जिल्ला अस्पतालमा उपचारपछि कारागार फर्किएका उनलाई पुनःसमस्या देखिएपछि जिल्ला अस्पताल लगिएकामा जिल्ला अस्पतालले नेपालगञ्ज रिफर गरेको थियो ।

डाक्टरले भेरी अञ्चल अस्पतालमा पनि उपचार सम्भव नहुने जनाएपछि सुविधा सम्पन्न अस्पतालमा रिफरको प्रक्रिया मिलाउदै गर्दा मृत्यु भएको जिल्ला कारागार गुलरियाका निमित्त जेलर डिल्लीचन्द्र पौडेलले बताए । राहुलको मृत्यु हृदयघातको कारण भएको डाक्टरले जानकारी दिएको पनि पौडेलले बताए ।

राहुलसहित तीन जनालाई डाँका मुद्दामा बर्दिया जिल्ला अदालतले असार ४ गते पुर्पक्षका लागि कारागार पठाएको थियो ।

स्वाथ्य समस्या देखिनेबित्तिकै उपचारको लागि अस्पताल लगिएको चौकीदार प्रेम सोडारीले बताए । मृतकको शव नेपालगञ्ज मेडिकल कलेजको शव गृहमा राखिएको र आफन्त आएपछि पोष्टमार्टम गरिने जेलर डिल्लीचन्द्र पौडेलले बताए ।

जिल्ला कारागार गुलरियामा क्षमता भन्दा दोब्बर कैदीबन्दी रहेका छन् । १ सय २५ जनाको क्षमता रहेकोमा भए पनि अहिले २ सय ७१ जना रहेका छन् ।

थुनुवा कैदीहरूलाई ठाउँ सानो भएका कारण सुत्न समस्या भएको छ । त्यसैगरी शौचालय जानकालागि पालो कुर्नुपर्ने अवस्था रहेको छ ।

अत्याधिक गर्मीका कारणले कैदी बन्दीहरू बिरामी हुने सख्या बढेको चौकीदार प्रेम सोडारीले गुनासो गरे । बिरामी भएका थुनुवा कैदीलाई नेपालगञ्ज लगेर उपचार गराइरहेको जेलर पौडेलले बताए ।


मानबहादुर चौधरी