उपचारका लागि निर्मलाका बावुलाई काठमाडौँ लगियो

  ०७५ मङ्सिर ९ गते

१४ दिनदेखि रातदिन धर्नमा बसेका निर्मला पन्तका बुवा यज्ञराज पन्तको मानसिक सन्तुलन बिग्रँदै गएपछि हवाईजहाजमार्फत काठमाडौँ लैजाने प्रयास असफल भएर अलपत्र परेका निर्मलाका बावु आमालाई मङ्सिर ८ गते राति गाडीमार्फत काठमाडौँ लगिएको छ ।

हवाइजहाजमा यज्ञराजको अवस्था देखेर सुरक्षाको कारण देखाउँदै जहाजमा चढाउन नमानेपछि उनीहरू गेटा विमानस्थलमा अलपत्र परेका थिए ।

सुदुरपश्चिम प्रदेश सरकारले निर्मलाका आमाबावुलाई हवाईजहाजले काठमाडौँ नलगेको खबर पाउनासाथ काठमाडौँ लैजान बन्दोबस्त मिलाउन मातहतका निकायलाई निर्देशन दिएको सुदुरपश्चिम प्रदेशका मुख्यमन्त्री त्रिलोचन भट्टका स्वकिय सचिव शिव ओलीले बताए ।

मानसिक सन्तुलन बिग्रिएर अस्वभाविक व्यवहार गर्न थालेपछि यज्ञराजलाई सेती अञ्चल अस्पतालमा बेहोस हुने सुई लगाएर काठमाडौँ लगिएको हो । उनको सुरक्षा र सहयोगका लागि तीन सुरक्षाकर्मीसहित एक स्वास्थ्यकर्मी पनि सँगै गएका छन् ।

यज्ञराजको उपचारका लागि महेन्द्रनगरदेखि उनकी पत्नी दुर्गादेवी पन्तसहित यज्ञराजका भिनाजु किशोर जोशी र ज्वाँइ गजाधर भट्टपनि साथमा गएका छन् ।

यज्ञराजकी कान्छी पत्नी लक्ष्मीले धर्नामा बसेर धर्नालाई निरन्तरता दिएकी छिन् । लक्ष्मीले न्याय नपाउञ्जेलसम्म धर्ना जारी राख्ने लक्ष्मीले बताइन् । छोरी निर्मलाका हत्यारा सार्वजनिकको माग राख्दै २५ कात्तिकदेखि जिल्ला प्रशासन कार्यालयको मुल गेटमा धर्नामा बसेका यज्ञराजको गएको सातादेखि स्वास्थसँगै मानसिक सन्तुलन गुम्दै आएको थियो ।

साउन १० गते साथीको घर गएकी निर्मला साउन ११ गते मृत भेटिएकी थिइन् । उनको बलात्कारपछि हत्या भएको थियो । निर्मला घटनाका बारेमा जिल्ला प्रहरी कार्यालय कञ्चनपुरले अनुसन्धान जारी राखेको जनाएको छ ।


कोमलनिरन्जन भाट