समाचारहरू

शिवनाथ गाँउपालिका-६ कनालीका विस्थापित शिक्षक दम्पतिले न्यायका लागि पहल गरिदिन इन्सेक जिल्ला प्रतिनिधिलाई असोज ३ गते निवेदन दिएपछि असोज ६ गते बैतडीका इन्सेक जिल्ला प्रतिनिधिले जिल्ला प्रहरी र जिल्ला शिक्षा कार्यालयका प्रमुखलाई भेटी घटनाको बारेमा सत्य तथ्य बुझी पीडितलाई पुनःस्थापित गर्न अनुरोध गरेका छन् ।

"प्रहरी टोली पठाएर एक पटक शिक्षकलाई गाँउमा स्थापित गरिएको र त्यतिवेला अवस्था सामान्य भएको थियो । दलित शिक्षक दम्पतिलाई धम्की दिने र विस्थापित गर्ने व्यक्तिहरू किटान गरी दोषी ठहरिएमा कारबाही गछौँ ।"-जिल्ला प्रहरी कार्यालयका प्रमुख हेरम्ब शर्माले भेटघाटका क्रममा इन्सेक प्रतिनिधिसँग प्रतिबद्धता जनाए ।

इन्सेकको पहलपछि जिल्ला शिक्षा कार्यालयले पनि उक्त घटनामा चासो देखाएको छ । जिल्ला शिक्षा अधिकारी लालसिंह टेरले अहिले विद्यालय निरीक्षकलाई समस्या समाधानको लागि उक्त क्षेत्रमा पठाएको र निरीक्षकको प्रतिवेदन आएपश्चात समस्या समाधान गरिने बताए । "अहिले विद्यालय निरीक्षकलाई पठाएका छौँ । उनले समाधान गर्न नसकेको अवस्थामा हामी आफैँ गएर विस्थापित शिक्षकलाई न्याय दिन्छौँ ।"-टेरले भने ।

आफ्नै गाँउबाट विस्थापित भई जिल्ला सदरमुकाम शाहिलेकमा बस्दै आएका ३५ वर्षीय करन राना र ३० वर्षीया पत्नी राजु रानाले स्थानीय गैरदलित समुदायकी छात्रा र दलित समुदायका छात्रलाई विवाह गराएको आरोपमा ०७३ चैत २६ गतेदेखि गाँउमा बस्न नदिएको पीडितहरूले निवेदनमा उल्लेख गरेका छन् ।

राना दम्पति स्थानीय कृष्ण निमावि र हिरापुर माविका शिक्षक हुन् ।  विस्थापित दम्पति १३ वर्षीया छोरी र नौ वर्षीय छोरासहित कहिले डडेल्धुरास्थित माइती घर र कहिले बैतडी जिल्ला सदरमुकाममा बस्दै आएका छन् ।

नरी बडु