इन्सेक पर्वतको पहलमा घरेलु हिंसाविरूद्ध उजुरी दर्ता, पीडित महिलाले न्याय पाइन्

  ०७६ कात्तिक २३ गते

पर्वतको मोदी गाउँपालिका–७ राम्जादेउरालीकी ५० वर्षीया खगेश्वरी केसीले आफू पतिबाट पीडित भएको भन्दै पर्वत जिल्लाका इन्सेक प्रतिनिधि समक्ष न्याय दिलाउन निवेदन दिएपछि महिलाले न्याय पाएकी छिन् ।

इन्सेक पर्वतका प्रतिनिधि सन्तोष थापाको पहलमा जिल्ला प्रहरी कार्यालय पर्वतको रोहबरमा पीडित महिलालाई न्याय दिलाइएको हो ।

पतिले अर्को विवाह गरेपछि आफूलाई र चार छोरी र एक छोरालाई पालन पोषणमा आवश्यक सहयोग नगरेको भन्दै न्याय माग्दै असोज २४ गते इन्सेक पर्वतमा निवेदन दिएकी थिइन् ।

इन्सेक प्रतिनिधि थापाले महिलाको तर्फबाट पति रुद्रबहादुर क्षेत्रीविरुद्ध जिल्ला प्रहरी कार्यालय पर्वतमा असोज २९ गते घरेलु हिंसाविरुद्ध उजुरी दर्ता गराएका थिए ।

पीडित महिलाले यसअघि ०७२ साल चैत १३ गते इन्सेककै पहलमा पतिले खाइपाइआएको रकमको तीन भागको एक भाग दिलाउने लिखित सहमति गरेपनि पति रुद्रबहादुर क्षेत्रीले सहमति अनुसार दिएका थिएनन् ।

जिल्ला प्रहरी कार्यालय पर्वतको महिला तथा बालबालिका सेवा केन्द्रमा २९ नम्बर मुद्दा अन्तर्गत उजुरी दर्ता भएको थियो ।

उजुरी दर्ता पश्चात् पतिपत्नी दुवैलाई छलफलमा उपस्थित गराई इन्सेक प्रतिनिधिको रोहबरमा कात्तिक १८ गते जिल्ला प्रहरी कार्यालय पर्वतले सहमति गराएको छ ।

सहमति अनुसार साउन १ गतेदेखि लागु हुने गरी पति रुद्रबहादुर क्षेत्रीले मासिक १० हजार ५ सय रुपियाँ प्रदान गर्ने र सहमति उल्लङ्घन गरेमा कानुनी कारवाही भोग्ने गरी सहमति भएको छ । पीडित महिलाका पति राम्जादेउराली अन्तर्गतकै शिद्ध प्राविमा स्थायी शिक्षकको रुपमा कार्यरत छन् ।


सन्तोष थापा