इन्सेक दार्चुलाद्वारा आर्थिक अवस्था कमजोर भएका दुई जना बालिकालाई आर्थिक सहयोग

  ०७४ कात्तिक ७ गते

इन्सेक दार्चुलाले महाकाली नगरपालिका-४ का आर्थिक अवस्था कमजोर भएका दुई जना टुहुरा बालिकालाई कात्तिक ७ गते आर्थिक सहयोग गरेको छ ।

महाकाली नगरपालिका-४ का ११ वर्षीया अनिशा निरौला र नौ वर्षीया अनुजा निरौलालाई आर्थिक सहयोग गरिएको हो ।

दुवै जना पशुपति शिक्षा मन्दिर खलङ्गामा अध्ययनरत छन् । अनिशा कक्षा-४ र बहिनी कक्षा-२ मा अध्ययनरत छन् । उनीहरूलाई ७० वर्षीया हजुरआमा लक्ष्मी निरौलाले पालन पोषण गरिरहेकी छन् । 'घरमा अभिभावकको रूपमा म मात्रै हुँ ।'-लक्ष्मीले भनिन्-'बच्चाको पालनपोषण, पढाउन र उनीहरूलाई एकसरो लुगा किन्नसमेत पैसा छैन ।'

दुवै दिदीबहिनीलाई पशुपति शिक्षा मन्दिरले कक्षा १० सम्म निःशुल्क पढाइदिने जनाएको छ । 'पशुपति शिक्षा मन्दिरका प्रधानाध्यापक प्रेमसिंह खातीले दुवै बालिकाको पढाइ निःशुल्क बनाइदिने बताएपछि ठूलो गून लागेको छ ।'-उनले भनिन् ।

'अहिले आफ्नो बृद्ध भत्ताबाट कापी कलम, विद्यालय पोशाक र दैनिक छाक टार्ने काम गरेकी छु ।'-उनले भनिन् । बुवा जयसिंह निरौलाको पाँच वर्षअघि मृत्यु भएको हो भने आमा गीता निरौलाले दुवै बच्चा छोडेर अर्को विवाह गरेर हिँडेपछि बालिका बेसाहारा बनेका छन् ।

'दसैँतिहार त्यतिकै गयो । नातिनीहरूले नयाँ लुगा किनिदिनु भन्दै थिए । केही गर्न सकिएन ।'-उनले भनिन्-'दैनिक दुई छाक टार्न आफू काम गर्न नसक्ने भएँ ।'-उनले इन्सेक प्रतिनिधिसामु रूँदै भनिन्-'उमेरले नेटो काट्यो । कसरी गुजारा चलाउने ? घरमा सहारा नभएपछि दुवै नातिनीहरूको पालनपोषण गर्न नसक्ने भएकी छु । नातिनीको पढाइको लागि कहिले महिला तथा बालबालिका कार्यालयमा गुहार गरेको छु कहिले छिमेकीलाइ गुहार्नु परेको छ । बुढेसकालमा समेत सुख नपाइने भयो ।'-उनले भनिन् ।


नरेन्द्रसिंह कार्की