इन्सेकद्वारा विर्तामोड घटनाको छानबिन गर्न माग

  ०७४ कात्तिक १२ गते

विर्तामोडमा एक जना सर्वसाधारणको ज्यान जाने गरी भएको घटनाको भर्त्सना गर्दै निश्पक्ष छानबिन गरी पीडितलाई न्याय दिन इन्सेकले माग गरेको छ ।

इन्सेक क्षेत्रीय कार्यालय विराटनगरका संयोजक सोमराज थापाद्वारा हस्ताक्षर गरी कात्तिक १२ गते जारी विज्ञप्तिमा आक्रोशित र अनियन्त्रित भीडलाई नियन्त्रणमा लिने क्रममा प्रहरीले अत्यधिक बल प्रयोग गरिएको र बिना सूचना अश्रुग्यास र गोली प्रहार गरिएको घटनाको यथार्थ बुझ्ने क्रममा ज्याकेटसहित अनुगमनमा रहेका स्थानीय मानव अधिकारकर्मी र सञ्चारकर्मीहरूलाई समेत अश्लील शब्द प्रयोग गरी गालीगलौज गर्नुका साथै दुर्व्यवहारसमेत गरिनु खेदजनक भएको उल्लेख गरिएको छ ।

कात्तिक १० गते गरिएको प्रदर्शनमा प्रहरीले चलाएको गोली लागि अर्जुनधारा नपा-११ का ३२ वर्षीय नरेश थापाको घटनास्थलमै मृत्यु भएको थियो ।

शान्ति सुरक्षाको जिम्मा लिएको प्रहरीबाटै यस किसिमको घटना हुनुलाई गम्भीरतापूर्वक लिइएको जनाउँदै विज्ञप्तिमा घटनाको सत्यतथ्य छानबिन गरी दोषीमाथि कडा कारबाही गर्न माग गरिएको छ ।

अर्जुनधारा नगरपालिका-११ का ११ वर्षीय बालक लक्ष्मण शिवाकोटीको असोज १४ गते दसैँको टिकाको दिन भएको मृत्यु शङ्कास्पद भएको भन्दै घटनाका सम्बन्धमा आफन्तले दिएको उजुरी उपर प्रहरी अनुसन्धान फितलो भएको आरोप लगाउँदै आफन्त र स्थानीय गाउँले आन्दोलित भएका थिए ।

Press Release of Jhapa.


इन्सेक क्षेत्रीय कार्यालय विराटनगर