इन्सेकको पहलमा घरेलु हिंसा तथा कुष्ठरोग पीडितले खानलाउन र लत्ताकपडा पाइन्

  ०७४ असार २३ गते

माइती घरबाट अपहेलित कुष्ठरोग पीडित सिमकोट गाउँपालिका-८ की ७० वर्षीया गोला शाहीको पक्षमा इन्सेकले वकालत गरेपछि जिल्ला प्रशासन कार्यालयलगायतका सरकारी तथा गैरसरकारी निकायबाट खाने व्यवस्था र ओढने, ओछ्याउने कपडा सहयोग पाएकी छन् ।

पीडितले इन्सेक जिल्ला प्रतिनिधि नन्द सिंहलाई आफू अन्यायमा परेको बताउँदै न्यायको लागि पहल गर्न असार १३ गते अनुरोध गरेकी थिइन् । इन्सेक जिल्ला प्रतिनिधिले सो घटना विवरण लिएपछि पीडित महिला र गाउँका उनका आफन्तलाई कानुनी प्रकृयाका बारेमा जानकारी दिँदै सम्झाईबुझाई गरे । माइती पक्षलाई सम्झाई सकेपछि असार १६ गते इन्सेक जिल्ला प्रतिनिधिले जिल्ला प्रशासन कार्यालयसमक्ष यस विषयमा जानकारी गराएका थिए ।

इन्सेक जिल्ला प्रतिनिधिले प्रमुख जिल्ला अधिकारी धनप्रसाद शर्मा पौडेलसँग बेसहारा भएकी शाहीका विषयमा विस्तृत जानकारी गराएपछि जिल्ला प्रशासन कार्यालय र इन्सेकको पहलमा गोला शाहीलाई महिला तथा बालबालिका कार्यालय, किडार्क हुम्ला र हिमाली विस्थापित अपाङ्ग सर्म्पर्क मञ्च काठमाडौँले खानलाउन र ओढने, ओछ्याउने कपडा सहयोग गरेका हुन् ।

पीडितको अधिकार प्राप्तिका लागि सम्बन्धित निकायमा जान इन्सेक हुम्लाले १ हजार रूपियाँ यातायात खर्च सहयोगसमेत गरेको छ ।

इन्सेक प्रतिनिधिको पहलमा गरेको कामलाई प्रमुख जिल्ला अधिकारी पौडेलले धन्यवाद दिँदै विगतको तुलनामा शाहीको अहिले राम्रो व्यवस्था भएको बताए । प्रशासन कार्यालयबाट एकसरो ओढने ओछ्याउने कपडा, भाँडाकुँडा, २० केजी चामल उपलब्ध गराएको प्रजिअ पौडेलले बताए । गोलालाई हवाई सेवा सञ्चालन भएपछि केही दिनमा हिमाली विस्थापित अपाङ्ग सम्पर्क मञ्च काठमाडौँका अध्यक्ष बिर्सिङ्ग सुनारले उपचारका लागि काठमाडौँ लैजाने बताए ।

माइतीले हेला गरेपछि कुष्ठरोग पीडित शाही १२ वर्षेखि गाउँबाट एक घण्टा टाढा रहेको जङ्गलमा बस्दै आएकी थिइन् । शाहीले बझाङ जिल्लाको पिमी नौरा भन्ने ठाउँमा विवाह गरेपछि पतिलाई रोग भएको उनले थाहा पाइन् । पतिको मृत्युपछि बेसहारा भएकी गोला शाही माइतीको साहाराको आशा गरेर हुम्ला आएकी थिइन् ।


इन्सेक क्षेत्रीय कार्यालय, नेपालगञ्ज