समाचारहरू

लमजुङ जिल्लाको पालिकाहरुमा भएको न्याय समितिको आफ्नो इजालस कक्ष नहुँदा न्याय सम्पादनमा असर परेको न्याय समितिका संयोजकहरुको गुनासो छ ।

जिल्लामा रहेका चार नगरपालिका र चार गाउँपलिका गरि जम्मा आठ ओटा पालिकाहरु मध्ये कुनैमा पनि आफ्नो इजालस कक्ष छैन ।

बेसीशहर नगरपालिका स्थित न्याय समितिका संयोजक लक्ष्मी अधिकारीका अनुसार भवन अभावको कारण न्याय समितिको काममा प्रभावित भएको बताउनुभयो । एउटा कोठामा सेवाग्राही र उजुरी कर्ता दुवै पक्षको भिडभाड हुने भएकोले पनि समयमा उजुरी कर्ताहरुको काम गर्न नसकिएको बताउनुभयो ।

काम छिटो नहुँदा सेवाग्राहीहरुले गुनासो गर्ने अधिकारीको भनाइ छ । राइनास नगरपालिकाकि न्याय समिति संयोजक धनकुमारी गुरुङका अनुसार इजालस कक्ष नहुँदा काम समयमानै गर्न नसकिएको बताउनुभयो ।

यस्तो समस्या जिल्लाको सबै पालिकाहरुमा भएको जिल्ला समन्वय समितिका अध्यक्ष लोकराज पाण्डेले बताउनुभयो । जिल्लामा रहेका आठ ओटा पालिकाहरुमा आर्थिक वर्ष ०७६/०७७ मा २ सय ८० ओटा उजुरीमा १ सय ३ ओटा मुद्दाको मात्र फैसला भएको जिल्लाको न्याय समितिको तथ्याङकमा उल्लेख छ । प्रतिशतको अनुपातमा ३६.७८ प्रतिशत मात्र फैसला भएको पाइएको छ ।

बेसीशहर नगरपालिकाका प्रमुख गुमान सिंह अर्याल सँग यस विषयका कुरा गर्दा उहाँले न्याय समितिका लागि इजालस कक्ष तत्काल बनाउने प्रतिबद्धता व्यक्त गर्नुभयो ।

सम्बन्धित न्याय समितिको संयोजकले पालिकाका प्रमुख र अध्यक्षसँग इजालस कक्ष निर्माणको लागि अनुरोध गरिएको बताउनुभएको छ ।

दलबहादुर मजाकोटी