इँटा भट्टामा जिउँदै मान्छे जलाएको घटनाका थप एक आरोपित गिरफ्तार

  ०७७ असार १९ गते

रौतहटको राजपुरमा ०६४ चैत २७ गते भएको विस्फोटमा घाइते भएका २३ जनालाई इँटा भट्टामा जिउँदै जलाएको आरोप छ । १३ वर्षअघि जिउँदै मान्छे जलाएको उक्त घटनामा संलग्न रहेको आरोप लागेका राजपुर नपा–६ का ३४ वर्षीय शेष सरोज भनिने शेष सराजलाई प्रहरीले असार १८ गते गिरफ्तार गरेको छ ।

बारा जिल्ला सिम्रौनगढ नगरपालिका स्थित नेपाल–भारत सीमा क्षेत्रबाट असार १८ गते आरोपित सराजलाई गिरफ्तार गरिएको जिल्ला प्रहरी कार्यालय रौतहटका डिएसपी भरत श्रेष्ठले बताउनु भयो ।

गिरफ्तार सराजले काँग्रेस नेता आफ्ताब आलमको निर्देशनमा आफूले मृत्यु भएका दुई/तीन जना र घाइते भएका १६ जनालाई बोरामा राखि ट्याक्टरबाट इँटा भट्टाको चिम्निमा लगेर जलाएको बयान दिएको डिएसपी श्रेष्ठले बताउनु भयो ।

सराजलाई जिल्ला अदालत रौतहटमा असार १९ गते पेश गरिएको प्रहरीले जनाएको छ । उक्त घटनाको मुख्य योजनाकार मानिएका काँग्रेस नेता आलम अदालतको आदेशमा हाल पुर्पक्षका लागि थुनामा छन् ।

प्रहरीका अनुसार ०६४ चैत २८ गतेको संविधान सभाको चुनावलाई लक्षित गरी आफ्ताव आलमले आफ्ना काका शेष इन्द्रिसको घरमा चैत २७ गते बम बनाउन लगाएका थिए ।

उक्त घटनाका सम्बन्धमा इन्सेक लगायतका संस्थाहरुले स्थलगत अध्ययन गरी ०७५ वैशाख २४ गते संक्षिप्त प्रतिवेदन सर्वाजनिक गरेका थिए ।


कोपिला तिमल्सिना