इँटा भट्टामा जिउँदै मान्छे जलाएको घटनाका थप एक जना आरोपित गिरफ्तार

  ०७७ मङ्सिर २४ गते

१३ वर्षअघि इँटा भट्टामा जिउँदै मान्छे जलाएको आरोपमा राजपुर नपा–४ राजपुरका ४६ वर्षीय महताव आलमलाई प्रदेश प्रहरी र जिल्ला प्रहरी कार्यालय रौतहटले मङ्सिर २२ गते गिरफ्तार गरेको छ ।

उक्त घटनाका मुख्य योजनाकार रहेका भनिएका महतावलाई प्रहरीले नेपाल भारत सीमामा रहेको बौधिमाई नपा–७ बङ्कुलबाट मङ्सिर २२ गते गिरफ्तार गरेको जिल्ला प्रहरी कार्यालय रौतहटका इन्स्पेक्टर सुशिलकुमार पाण्डेले बताउनु भयो ।

पहिलो संविधान सभा निर्वाचनको अघिल्लो दिन ०६४ चैत २७ गते राति राजपुर नपा–४ फरदवा गाउँमा नेपाली कांग्रेसका नेता शेष इद्रिसको घरमा निर्वाचनलाई लक्षित गरेर बम बनाउँदै गर्दा बम विष्फोट हुँदा दुई जनाको मृत्यु भएको थियो ।

सो घटनामा कांग्रेसका नेता तथा पूर्व सांसद आफताव आलमको संलग्नता रहेको र बम विष्फोटमा परेर घाइते परेका २३ जनालाई आलमले इँटाभट्टामा जिउँदै जलाएर हत्या गरेको आरोपमा किटानी उजुरी परेको थियो ।

उक्त विष्फोटनमा परेर सरुअठाका २४ वर्षीय त्रिलोकप्रताप सिंह र २२ वर्षीय ओसी अख्तरको मृत्यु भएको थियो ।

घटना लगत्तै मृतक त्रिलोकप्रताप सिंहका बुबा श्रीनारायण सिंह र ओसी अख्तरकी आमा रोक्साना खातुनले आलमसहित महताव आलम, मोविन आलम, शेख भदई र शेख सरोज विरुद्ध किटानी उजुरी दिनु भएको थियो ।

महान्यायाधिवक्ताको कार्यालयमार्फत जिल्ला सरकारी वकिलको कार्यालय रौतहटले ०६५ असार ३० गते अनुसन्धान प्रतिवेदन हेरेर मुद्दा नचलाउने निर्णय गरेको थियो ।

तर, ०६९ जेठ १४ गते तत्कालीन न्यायाधीश सुशीला कार्कीको इजलासले जघन्य अपराधमा छानविन गरेर मुद्दा चलाउने आधार हुँदाहुँदै अनुसन्धान नगरेकोमा सुरुबाट अनुुसन्धान गर्न जिल्ला प्रहरी कार्यालय रौतहटलाई आदेश दिएको थियो ।

सोही घटनाको आरोपमा आफताव आलमलाई प्रहरीले ०७६ असोज २६ गते गिरफ्तार गरेकोमा हाल पुर्पक्षका लागि थुनामा रहेको प्रहरीले जनाएको छ । महताव कांग्रेस नेता तथा पूर्व सांसद आलमका भाइ रहेको इन्स्पेक्टर पाण्डेले बताउनु भयो ।

संविधान सभाको निर्वाचनलाई लक्षित गरी आलमले आफ्ना काका शेष इद्रिसको घरमा चैत २७ गते बम बनाउन लागएको प्रहरीको भनाई छ । बम विस्फोटमा परी घाइते भएकाहरूलाई ट्रयाक्टरबाट इँटा भट्टाको चिम्नीमा लगेर जलाएको आरोप छ ।

उक्त घटनाका सम्बन्धमा अनौपचारिक क्षेत्र सेवा केन्द्र (इन्सेक) लगायतका संस्थाहरूले स्थलगत अध्ययन गरी ०७५ वैशाख २४ गते संक्षिप्त प्रतिवेदन सार्वजनिक गरेका थिए ।


कोपिला तिमल्सिना