इँटा भट्टाका मजदुरलाई खाद्यन्नको समस्या

  ०७६ चैत १८ गते

कोरोना भाइरसको संक्रमण फैलिन नदिन सरकारले गरेको लकडाउनपछि धादिङका इँटा उद्योगमा काम गर्ने मजदुरहरू खाद्यन्न सकिदा समस्यामा परेका छन् ।

उद्योग बन्द भएपछि उद्योग सञ्चालकहरू सुरक्षित ठाउँमा गए । मजदुरहरू दिनदिनै काम गर्ने र एक सातामा रकम लिएर खाद्यान्नको जोहो गर्दै आएका थिए । एक सातादेखि उद्योग बन्द भएको र खाद्यान्न पसल समेत खुला नभएपछि मजदुर र उनीहरूका बालबालिका भोकभोकै परेको सामाजिक अभियन्ता बिपना प्याकुरेलले बताउनु भयो ।

‘भट्टा सञ्चालकले दिएको ज्यालाबाट सामान किन्ने गरिएको थियो, अहिले अलपत्र परियो’ एभरेष्ट इँटा उद्योगका मजदुर परशुराम परियारले भन्नुभयो  ।

तीन बच्चासँगै पाँचजनाको परिवार इँटा बोकेर पालिरहेको अहिले समस्यामा परेको उहाँले बताउनु भयो । ‘काम गरेको दिनमामात्रै चुलो बोल्थ्यो, अब भोकै बस्नुको विकल्प छैन’ जालपादेवी इँटा उद्योगका मजदुर रोल्पा जिल्लाकी दिलमाया बुढाले दुखेसो गर्नुभयो । लकडाउने कारण घर फर्कन पनि समस्या भएको र यहाँ आफूहरूलाई भोकै बस्न परेको उहाँले बताउनु भयो ।

जिल्लामा धुनिबेसि, नीलकण्ठ नगरपालिका, गजुरी, सिद्धलेक र थार्के गाउँपालिकामा गरि ४२ ओटा इँटा उद्योग दर्ता भई सञ्चालनमा रहेका छन् । यी इँटा उद्योगहरूमा धादिङ जिल्लालगायत रुकुम, रोल्पा, दाङ, रौतहट, सर्लाही, सिन्धुलि जिल्ला र भारतबाट समेत गरि ६ हजारभन्दा बढी मजदुर कार्यरत छन् । धुनीबेसी र थाक्रेमा मात्र एक हजारको संख्यामा बालबालिका रहेको इँटा उत्पादक सङ्घका अध्यक्ष निराजन रेग्मीले जानकारी दिनुभयो ।

मजदुर र उनीहरुको परिवारको अवस्था नाजुक हो भने आफूहरूले तत्काल केही राहतको प्रबन्ध गर्ने धुनिबेशी नगरपालिकाका प्रमुख बालकृष्ण आचार्यले बताउनु भयो । धुनीबेसी र थाक्रेमा मात्र १ हजारको सङ्ख्यामा बालबालिका रहेको इँटा उत्पादक सङ्घका अध्यक्ष निराजन रेग्मीले जानकारी दिनुभयो ।


सिताराम अधिकारी