आर्थिक अभावका कारण सुत्केरी महिला उपचारबाट वञ्चित

  ०७७ चैत्त १८ गते

बढैयाताल गाउँपालिका– २ सीतापुरकी सुत्केरी महिला १८ वर्षीया नैसरा शाही आर्थिक अभावका कारण उपचारबाट वञ्चित हुनु भएको छ ।

एक महिनाको सुत्केरी शाही सुत्केरी हुँदा कुनै समस्या नभएपनि ०७७ चैत ७ गते घरमै रहेको अवस्थामा काम गर्दै गर्दा बेहोस भएर ढलेपछि आर्थिक अभावका  कारण उपचार गर्न जान सक्नु भएको छैन ।

इन्सेकद्वाारा गठित मानव अधिकार निगरानी समूहका सदस्य किशन सुनारको अगुवाईमा स्थानीइले चैत ८ गते उपचारको लागि चन्दा सङ्कलन गरेर भेरी अस्पताल नेपालगञ्जमा उपचार गराएको भएपनि सुधार हुन सकेको छैन ।

उहाँको शरीरको दायाँ भागको कम्मर भन्दा तल चलाउन नमिल्ने अवस्थामा थलिएर बस्न पर्ने अवस्था छ । एक महिनाको बच्चालाई दुध खुवाउन र दिसा पिसाव गर्न पनि अरूकै साहारा लिनुपर्ने अवस्था रहेको छ ।

आर्थिक अभावका कारण सुविधा सम्पन्न अस्पतालमा थप उपचार गर्न जान सक्ने अवस्था उहाँको छैन ।

जाजरकोट जिल्लाको शिवालय गाउँपालिका– ५ बाट चार महिना अघि सहज जीवन बिताउने आशा लिएर उहाँको ६ जनाको परिवार बढैयाताल गाउपालिका– २ सीतापुरमा अरुकै खाली रहेको घरमा बस्दै आउनु भएको छ । उहाँका पति २० वर्षीय भगत शाही बैदेशिक रोजगारीका लागि भारतमा रहेका छन् ।

सुत्केरी भएपछि बिरामी भएर थलिनु भएकी नैसरालाई साँझ बिहान खानलाई अन्नको पनि अभाव रहेको छ । सुत्केरी भएपछि खान पर्ने पोषण र स्याहार बाटपनि  वञ्चित हुनु भएको छ ।

गाउँलेहरूले माना चामल उठाएर खानाको व्यवस्था गरेपनि पोषणयूक्त खाना र उपचार गराउन नपाउँदा आफु र बच्चाको भविष्य प्रति नैसराले चिन्ता व्यक्त गर्नु भयो ।

नेपालको संविधानमा मौलिक हकको धारा ३५ मा स्वास्थ्य सम्बन्धी हकको व्यवस्था गरिएको छ भने ार ३६ मा खाद्य सम्बन्धी हकको व्यवस्था गरिएको भएपनि व्यवहारमा कार्यान्वयन हुन सकेको छैन  ।

बढैयाताल गाउँपालिकाकी उपाध्यक्ष दिपा गौतमले अति गरिब असहाय व्यक्तिको उपचारका लागि उपचारको लागि सहयोग गर्न छुट्टै कोष नभएको तर केही समयको लागि खाद्यन्न र नेपालगञ्जसम्म जान आउनका खर्चको व्यवस्था गर्न सकिने बताउनु भयो ।


मानबहादुर चौधरी