आयोगको काम कारबाहीबारे अनभिज्ञ छौं: द्वन्द्वपीडित
बेपत्ता पारिएका व्यक्तिको छानबिन आयोगको काम कारबाहीबारे नेपालगञ्जमा आयोजित एक कार्यक्रममा सहभागी द्वन्द्व पीडितहरूले अनभिज्ञता प्रकट गरेका छन् ।
बलपूर्वक बेपत्ता बनाउने कार्य विरूद्धको अन्तर्राष्ट्रिय दिवसका सन्दर्भमा राष्ट्रिय मानव अधिकार आयोग र न्यायका लागि द्वन्द्व पीडित समाज बाँकेको आयोजना तथा इन्सेक, आइसीजे, एडभोकेसी फोरम, हरप्लेस, मानव अधिकार एलाइन्स लगायतका संस्थाको सहकार्यमा भदौ १३ गते नेपालगञ्जमा आयोजित बेपत्ता पारिएका व्यक्तिको छानबिन आयोगको प्रभावकारिता र पीडितलाई न्याय विषयक अन्तरसम्वाद कार्यक्रममा सहभागी द्वन्द्व पीडितहरूले अनभिज्ञता प्रकट गरेका हुन् ।
कार्यक्रममा कोहलपुरकी द्वन्द्वपीडित देवीसरा विकले आयोगमा उजुरी दिएको पाँच महिना बितिसक्दा पनि काम कारबाही र प्रकृयाका बारेमा आफू अनभिज्ञ रहेको बताउँदै पीडितले न्याय पाउने विषयमा शङ्का उत्पन्न भएको गुनासो गरिन् । द्वन्द्वपीडित चन्द्रा अधिकारीले पहुँच भएका द्वन्द्वपीडितले सेवा सुविधा पाएको र पहुँच नहुनेले सूचना पाउनबाट समेत वञ्चित हुनु परेको बताइन् ।
कार्यक्रममा पुनरावेदन अदालत नेपालगञ्जका मुख्य न्यायाधीश बमकुमार श्रेष्ठले द्वन्द्वपीडितको एकता र सामूहिक प्रतिवद्धताको परिणाम सत्य निरूपण तथा मेलमिलाप र बेपत्ता पारिएका व्यक्तिको छानबिन आयोग बनेको बताए ।
मुख्य न्यायाधीश श्रेष्ठले द्वन्द्वपीडितलाई न्यायका लागि आशावादी भई धैर्य रहन आग्रह गरे । प्रमुख जिल्ला अधिकारी रविलाल पन्थले नीतिगत रूपमा भएका विषय कार्यान्वयनमा रहेको बताउँदै कतिपय आवाजहरू कानुनले सम्बोधन गर्न नसकेका विषयमा माथिल्लो निकायमा पुर्याउने प्रतिवद्धता जनाए ।
राष्ट्रिय मानव अधिकार आयोगका क्षेत्रीय निर्देशक मुरारी खरेलले आयोगले गरेका सबै सिफारिस कार्यान्वयन हुनुपर्नेमा जोड दिए । न्यायका लागि द्वन्द्वपीडित समाजका केन्द्रीय अध्यक्ष जनक राउतले आयोगले कमजोर ऐन बनाएको बताउँदै पीडितहरूले विरोध गरेपछि आफूहरूसँग सुझाव मागेको र सुझाव दिएपछि कार्यान्वयन नगरेको आरोप लगाए ।
उनले आयोगमा परेका उजुरी सम्बन्धमा तामेलीमा राख्ने विषयले पीडितहरूलाई आयोगप्रति थप शङ्का उत्पन्न भएको बताए ।
कार्यक्रममा नेपाली कांग्रेसका सचिव तप्त पौडेलले पीडितहरूले छिटो न्याय पाउनु पर्ने धारणा राखे । नेकपा एमालेका सचिव रत्न खत्रीले राजनीतिक इच्छा शक्तिको अभावमा पीडितहरूले न्याय पाउन नसकेको बताए ।
त्यसैगरी बलपूर्वक बेपत्ता बनाउने कार्य विरूद्धको अन्तर्राष्ट्रिय दिवसको सन्दर्भमा भदौ १३ गते बिहान नेपालगञ्जमा रक्तदान कार्यक्रम समेत सम्पन्न भएको छ । रक्तदान कार्यक्रममा द्वन्द्वपीडित, अधिकारकर्मी र नागरिक समाजमा आवद्ध २० जनाले रक्तदान गरेको न्यायका लागि द्वन्द्वपीडित समाज बाँकेकी अध्यक्ष चन्द्रकला उप्रेतीले जानकारी दिइन् ।
विनोद पाण्डे
संबंधित समाचारहरू
स्वास्थ्यचौकी नभएका कारण स्थानीयहरू स्वास्थ्य सेवाबाट वञ्चित
संविधानमा प्रत्येक नागरिकलाई राज्यबाट आधारभुत स्वास्थ्य सेवा निःशुल्क प्राप्त गर्ने हक हुनेछ र कसैलाई पनि आकस्मिक स्वास्थ्य सेवाबाट वञ्चित गरिने छैन भनी उल्लेख गरिएको भएपनि शिखर नगरपालिका–१० थाप्सा र लाम्बाटाका…
अनसनरत डाक्टर केसीलाई लिन आएको हेलिकप्टर त्यसै फर्कियो
डडेल्धुरामा आमरण अनसनरत डाक्टर गोविन्द केसीको स्वास्थ्य अवस्था नाजुक बन्दै गएको भनी डडेल्धुरा अस्पतालका चिकित्सकले भनेपछि उनलाई काठमाडौँ लैजान आएको नेपली सेनाको हेलिकोप्टर रित्तै फर्किएको छ । डाक्टर केसीले डडेल्धुरा…
घरेलु हिंसा पीडितद्वारा प्रहरीमा उजुरी दर्ता
महावै गाउँपालिका–२ की १६ वर्षीया तारा लुहारलाई बच्चा नजन्माएको आरोपमा कुटपिट गरी घरनिकाला गरेको भन्दै पीडित बालिकाले २४ वर्षीय पति पुन्न लुहारविरूद्ध कात्तिक २५ गते जिल्ला प्रहरी कार्यालय, कालिकोटमा उजुरी…
बलात्कार घटनाका आरोपित गिरफ्तार
१२ वर्षीया बालिकालाई कात्तिक २१ गतेदेखि २३ गतेसम्म पटकपटक बलात्कार गरेको आरोपमा धनगढी उपमहानरपालिका–१ का १९ वर्षीय सुमित गुप्तालाई प्रहरीले कात्तिक २४ गते गिरफ्तार गरेको छ । पीडित बालिकाकी आमाले…
कास्कीमा सातओटा मतदानस्थल अति संवेदनशील, आठओटा संवेदनशील
आगामी मङ्सिर १४ गते हुने उपनिर्वाचनमा कास्की क्षेत्र नम्बर २ का सातओटा मतदानस्थल अति संवेदनशील र आठओटा मतदानस्थल संवेदनशील रहेका जिल्ला सुरक्षा समिति, कास्कीले जनाएको छ । कुल ३२ ओटा…
