आफ्नो पार्टीका उम्मेदवारलाई मतदान नगरेको आरोपमा कुटपिट

  ०७४ जेठ ७ गते

स्थानीय तहको निर्वाचनमा आफ्नो पार्टीका उम्मेदवारलाई मतदान नगरेको आरोपमा सिमकोट गाउँपालिका-७ का ३८ वर्षीय पदमराज शाहीलाई सोही ठाउँ निवासी नेपाली काङ्ग्रेसका कार्यकर्ता २० वर्षीय नवराज शाही लगायतका व्यक्तिले जेठ ६ गते डाडाफयाँ गाउँमा कुटपिट गरेको पीडित पक्षले आरोप लगाएको छ ।

काङ्ग्रेसका कार्यकर्ताले पदमराजका १५ वर्षीय छोरा कविराज शाहीलाई समेत कुटपिट गरेको पीडित पक्षले बतायो । घटनामा संलग्न पक्षलाई कारबाहीको माग गर्दै पीडितले जेठ ६ गते जिल्ला प्रहरी कार्यालयमा उजुरी दिएका छन् ।

पीडित शाहीका अनुसार काङ्ग्रेसका वडा अध्यक्षको उम्मेदवार गोपी सिंह स्थानीय तहको निर्वाचनमा हारेपछि काङ्ग्रेसका कार्यकर्ताले आफूलाई कुटपिट गरी मार्ने धम्की दिएको बताए ।

बालक कविराजको जिल्ला जनस्वास्थ्य कार्यालयमा उपचार हुन नसकेपछि जिल्ला बाहिर रिफर गरिएको जनस्वास्थ्य कार्यालयका प्रमुख डा.स्मृति महतले बताइन । महतका अनुसार बालकको रुद्रघन्टीमा चोट लागेको र जिल्लामा उपचार हुन नसकेपछि नेपालगञ्ज रिफर गरेको बताइन् । जिल्ला प्रहरी कार्यालयका प्रमुख डिएसपी कमलप्रसाद नेपालले वैशाख ३१ गतेको निर्वाचनका विषयमा बालक र उनका बुबालाई हातपात गरेको हन सक्ने बताए । घटनामा संलग्न व्यक्ति फरार रहेको प्रहरीले जनाएको छ ।


नन्द सिंह