आन्दोलनकारीद्वारा दुई ओटा सरकारी कार्यालयमा आगजनी

  ०७४ माघ ४ गते

सरकारले प्रदेश नम्बर १ को राजधानी विराटनगर तोकेको विरोधमा उत्रिएका धनकुटाबासीले माघ ४ गते दुई ओटा सरकारी कार्यालयमा आगजनी गरेका छन् भने तीन ओटा कार्यालयमा तोडफोड गरेका छन् ।

photo20180118dhankuta (8)

प्रदेश नम्बर १ को अस्थायी राजधानी धनकुटालाई तोक्नु पर्ने माग राख्दै ३४ दिनदेखि आन्दोलनमा उत्रिएका धनकुटाबासीले देउवा सरकारले बुधवार विराटनगरलाई अस्थायी राजधानी तोकेपछि उनीहरू हिंसात्मक आन्दोलनमा उत्रिएका हुन् ।

photo20180118dhankuta (7)

आन्दोलनकारीले क्षेत्रीय प्रशासन कार्यालय धनकुटा र शहरी विकास तथा भवन निर्माण विभाग डिभिजन कार्यालय धनकुटामा आगजनी गरेका छन् ।

photo20180118dhankuta (6)

आगजनीबाट क्षेत्रीय प्रशासन कार्यालयको दुई थान कम्प्यूटर, एक थान प्रिन्टर र हेलो सरकारको इन्टरनेटको तार जलेर नष्ट भएको प्रमुख जिल्ला अधिकारी प्रेमप्रकाश उप्रेतीले बताए ।

photo20180118dhankuta (5)

त्यस्तै आन्दोलनकारीले डिभिजन कार्यालय धनकुटाको को १ ब १०६४ नम्बरको मोटरसाइकल जलाएका छन् । आन्दोलनकारीले डिभिजन कार्यालय, क्षेत्रीय प्रशासन कार्यालय, उच्च अदालत विराटनगर धनकुटा इजलासको कार्यालय, मालपोत कार्यालय र नापी शाखा कार्यालयका झ्यालका सिसा फुटाएर नष्ट पारेको पनि प्रजिअ उप्रेतीले बताए । आगजनीबाट क्षेत्रीय प्रशासन कार्यालयमा मात्रै १० लाख भन्दा बढीको क्षति भएको छ ।

photo20180118dhankuta (4)

धनकुटा बजारको विभिन्न स्थानमा आन्दोलनकारी र प्रहरीबिच दिनभर झडप भएको छ । धनकुटाको भीमनारायण चोकमा झडप हुदाँ प्रहरीले तीन राउण्ड अश्रृग्यास प्रहार गरेको छ ।

photo20180118dhankuta (3)

सो क्रममा प्रहरीको लाठी प्रहारबाट नेपाली काङ्ग्रेसका जिल्ला कोषाध्यक्ष ३८ वर्षीय दिनेश राईको टाउको फुटेको छ । उनको उपचार जिल्ला अस्पताल धनकुटामा भइरहेको छ । उनको टाउकोमा ११ ओटा टाँका लगाइएको छ ।

photo20180118dhankuta (2)

त्यस्तै प्रदेश नम्बर १ को राजधानी धनकुटा बनाउ आन्दोलन परिचालन समितिका संयोजक ४८ वर्षीय सुन्दरबाबु श्रेष्ठ पनि सामान्य घाइते भएका छन् । उनको उपचार पनि जिल्ला अस्पतालमा भयो ।

photo20180118dhankuta (1)

आन्दोलनकारीले धनकुटा नगरपालिका छेउमा धरानबाट भोजपुरतर्फ बिरामी लिन जाँदै गरेको को २ च ४३२ नम्बरको एम्बुलेन्स र जिल्ला प्रहरी कार्यालय धनकुटाका एसपी सुदिप राजभण्डारी चढेको ना १ झ १३१४ नम्बरको गाडी तोडफोड गरेका छन् ।

सयौँको सङ्ख्यामा विरोधमा उत्रिएका धनकुटाबासीले धनकुटाको सरस्वतीचोकमा को २९ प ३७५४, को ३२ प ४४०० र यलम्बरचोकमा को १८ प ७३९३ नम्बरको मोटरसाइकल तोडफोड गरेका छन् । आन्दोलनकारीले धनकुटाको सल्लेरीदेखि जिरोप्वाइन्टसम्म सडकमा ढुङ्गामुडा तेर्स्याएर अबरूद्ध गरेका छन् ।

स्थानीय प्रशासनद्वारा निषेधाज्ञा जारी

आन्दोलनले हिंसात्मक रूप लिन थालेपछि स्थानीय प्रशासनले माघ ४ गते दिउँसो ११:४५ बजेदेखि अनिश्चितकालीन निषेधाज्ञा जारी गरेको छ ।

आन्दोलनले उग्र रूप लिएपछि त्यसलाई नियन्त्रण गर्नको लागि निषेधाज्ञा जारी गरिएको प्रमुख जिल्ला अधिकारी प्रेमप्रकाश उप्रेतीले बताए ।

धनकुटा बजारको उत्तरमा देब्रेबास, दक्षिणमा आत्मारा ढाँट, पूर्वमा बिहिबार हटिया र पश्चिममा आँखा अस्पताललगायतका क्षेत्रमा निषेधाज्ञा जारी गरिएको छ ।

निषेधाज्ञा जारी गर्नु पूर्व प्रहरीले माइकिङ गरेर र्सवसाधारण नागरिकलाई हिँडडुल नगर्न आग्रह गरेको थियो ।


सन्तोष रूचाल