आत्महत्या गर्न दुरूत्साहन गरेको आरोपमा पतिविरूद्ध प्रहरीमा उजुरी दर्ता

  ०७६ साउन १५ गते

राइनास नपा–६ की १९ वर्षीया प्रमिला नेपालीलाई आत्महत्या गर्न दुरूत्साहन गरेको आरोपमा पीडित पक्षले २५ वर्षीय सन्तोष नेपालीका विरूद्ध साउन १४ गते जिल्ला प्रहरी कार्यालय, लमजुङमा उजुरी दिएको छ ।

मृतकले साउन ९ गते सुसाइड नोट लेखी आफ्नै घरको कोठामा डोरीको पासो लगाई आत्महत्या गरेको विषयलाई आधार बनाई माइती पक्षले पतिविरूद्ध उजुरी गरेको जिल्ला प्रहरी कार्यालय, लमजुङका डिएसपी रविन्द्रमान गुरुङले जानकारी दिए ।

वैदेशिक रोजगारीका लागि भनेर घरबाट यही साउन ६ गते गएका पतिले आफूलाई मानसिक यातना दिने गरेको भनी मृतकले सुसाइड नोटमा उल्लेख गरेको भेटिएको डिएसपी गुरुङले जानकारी दिए ।

आरोपितलाई भने प्रारम्भिक अनुसन्धानका लागि साउन १३ गते नै गिरफ्तार गरी घटनाको अनुसन्धान गरिरहेको जिल्ला प्रहरी कार्यालय, लमजुङले जनाएको छ । शवको पोष्टमार्टम साउन १२ गते जिल्ला सामुदायिक अस्पतालमा गरिएको प्रहरीले जनाएको छ ।

मुलुकी अपराध संहिता, २०७४ को दफा १८५ को उपदफा १ मा कसैले कसैलाई आत्महत्या गर्न दुरूत्साहन गरेमा वा त्यस्तो काम गर्ने सम्मको परिस्थिति खडा गरेमा कसुर गर्ने व्यक्तिलाई ५ वर्षसम्म कैद र ५० हजार रुपियाँसम्म जरिवानाको व्यवस्था गरेको छ ।


दलबहादुर मजाकोटी