अस्पताल सुधारको माग गर्दै सद्भावना गजेन्द्रवादीका अध्यक्ष आमरण अनसनमा

  ०७३ मङ्सिर ८ गते

राजविराजस्थित गजेन्द्रनारायण सिंह सगरमाथा अञ्चल अस्पतालमा सुधारको माग गर्दै नेपाल सद्भावना पार्टी गजेन्द्रवादीका राष्ट्रिय अध्यक्ष विकास तिवारी मङ्सिर ८ गते अपरान्हदेखि आमरण अनसनमा बसेका छन् ।

अस्पताल बालमैत्री हुनुपर्ने, बिरामीहरूलाई पोषिलो र स्वच्छ पिउने पानीको व्यवस्था हुनुपर्ने, चिकित्सकहरू उपलब्ध हुनुपर्ने, निर्मार्णाधिन प्रसुति गृह अविलम्ब पुरा हुनुपर्ने, शौचालय र धाराहरू चालु हुनुपर्नेलगायतका माग गर्दै मधेसी मोर्चाका वरिष्ठ सल्लाहकार समेत रहेका तिवारीले अस्पताल परिसरमा आमरण अनसन थालेका हुन् ।

अस्पतालको अव्यवस्था, असुविधाको विरोध जनाउँदै मधेसी मोर्चा सप्तरीले अस्पतालमा विभिन्न सुधारको माग गर्दै कात्तिक १२ गते अल्टिमेटमसहितको २४ बुँदे ज्ञापनपत्र बुझाएको थियो ।

ज्ञापनपत्रको स्मरण गराउन आएका तिवारीले आकस्मिक रूपमा अनसन सुरु गरेका हुन् । तिवारीले  अनुसार ज्ञापनपत्रको स्मरण गराउन आएको मोर्चाको टोलीसँग अस्पतालका निमित्त मेडिकल सुपरिटेण्डेण्ट डा. दिलिपकुमार साहले दुर्व्यवहार गरेको आरोप लगाउँदै त्यसलगत्तै अनसन सुरु गरिएको बताए ।

मोर्चाले निशुल्क वितरण हुने औषधिहरूको सूची, चिकित्सक, कर्मचारीको दैनिक समय तालिका सार्वजनिक रूपमा टाँस्नुपर्ने तथा प्राप्त बजेट र खर्च विवरण उपलब्ध गराउनु पर्ने माग राखेको छ ।


मनोहरकुमार पोखरेल