अस्पतालको लापरवाहीका कारण सुत्केरी प्रोत्साहन भत्ता पाउनबाट वञ्चित

  ०७६ भदौ ११ गते

दमौली अस्पतालको लापरवाहीका कारण गत आर्थिक वर्षमा अस्पतालमा सुत्केरी भएका २३ जना  यातायात खर्च पाउनबाट वञ्चित भएको गुनासो गरेका छन् ।

सरकारले सरकारी स्वास्थ्य संस्थामा सुरक्षित सुत्केरी गराउने महिलालाई यातयात खर्च बापत पहाडी जिल्लामा २ हजार रुपियाँ प्रदान गर्दै आएको छ ।

त्यसबाहेक नियमित चार पटक गर्भ परीक्षण गर्नेलाई थप ८ सय रुपियाँ उपलब्ध गराउने नीति भएपनि दमौली अस्पतालमा गत आर्थिक वर्षको अन्तिम सातामा सुत्केरी भएका २३ जना सो सुविधाबाट वञ्चित भएका हुन् ।

अस्पतालको सरकारी खाता असोज २५ गते नै बन्द गरिएको र त्यसपछि कुनै पनि रकम झिक्न नपाएको कारण सो मिति भन्दापछि सुत्केरी हुन आउनेलाई रकम दिन नसकिएको दमौली अस्पताल, व्यवस्थापन समितिका अध्यक्ष प्रदिपराज अधिकारीले बताए ।

सुत्केरीले रकम नपाएको बारेमा आफूले नयाँ आर्थिक वर्ष लागेपछि मात्र जानकारी पाएको हुँदा त्यसबारेमा सम्बन्धित कर्मचारीलाई स्पष्टिकरण सोधेको अधिकारीले बताए ।

असार २५ गतेपछि असार ३२ गतेसम्म दमौली अस्पतालमा २३ जना महिला सुत्केरी भएका थिए । ति सबै सुत्केरीले प्राविधिक कठिनाइका कारण अब सरकारी सुविधा नपाउने दमौली अस्पतालकी नर्सिङ अधिकृत जमुनादेवी शर्माले बताइन् ।

अहिले नयाँ आर्थिक वर्षसुरू भएको कारण अघिल्लो वर्षको सुत्केरीको अब रकम उपलब्ध गराउन नसकिने शर्माले बताइन् ।

अस्पताल व्यवस्थापन समितिका सदस्य नरेन्द्र ढकालले सबै आर्थिक व्यवस्थापनको कुरा लेखापालले मिलाउनु पर्नेमा उनकै कारण यो समस्या भएको बताए ।

दमौली अस्पतालमा गत आर्थिक वर्षमा ६ सय ७ जना महिला सुरक्षित सुत्केरी भएका थिए । त्यसमध्ये असार अन्तिम साता सुत्केरी भएका २३ जना मात्र सुविधा पाउनबाट वञ्चित भएका हुन् ।

त्यसैगरी चालु आर्थिक वर्षको साउन मसान्तसम्म दमौली अस्पतालमा सुत्केरी भएका ७२ जनाले पनि हालसम्म यो सुविधा पाएका छैनन् ।

चालु आर्थिक वर्षमा अहिलेसम्म खाता सञ्चालनको अख्तियारी प्राप्त नभएको कारण सुत्केरी भएका कसैलाई पनि यातायात खर्च दिन नसकिएको र खाता सञ्चालन हुनासाथ सम्पर्क गरेर रकम उपलब्ध गराउने नर्सिङ अधिकृत शर्माले बताइन् ।


प्रकाशचन्द्र भट्टराई