समाचारहरू

दैलेखको पिलाडीमा दसैँको बेला रोकिएका ५ ओटा बालविवाहको सूचना दिएको आरोपमा असुरक्षित भनिएका सामाजिक अभियन्ताहरूको सुरक्षामा आफूहरू संवेदनशील रहेको प्रहरी र स्थानीय राजनीतिक दलका नेताहरूले प्रतिवद्धता जनाएका छन् ।

बालविवाह रोकथाम अभियानमा लागेकी पिलाडी गाविस-२ की ललिता बीसीलाई विवाह रोकिएका परिवारबाट ज्यान लिनेसम्मको धम्की आएको सन्दर्भमा इन्सेक दैलेखको पहलमा कात्तिक ७ गते पिलाडीमा आयोजित सर्वपक्षीय अन्तरक्रिया कार्यक्रममा उनीहरूले यस्तो प्रतिवद्धता जनाएका हुन् ।

अन्तरक्रियामा सामाजिक अभियान्ता ललिताले भनिन्-'बालविवाह रोक्नु सबैको दायित्व हो भनेर घर घरमा पुगेर रोक्न लगाएँ ।' खुला अन्तरक्रियामै उनको असन्तुष्टीपछि अन्तरक्रियामा सहभागी नेपाली काङ्ग्रेसका इन्द्रबहादुर आरसी, नेकपा एमालेका दलसिंह बुढा, नेपाल राष्ट्रिय माविका प्रधानाध्यपक कृष्णकुमार र प्रहरी चौकी धरमपोखराका अर्सइ भीमबहादुर बस्नेतले बालविवाह रोक्ने सामुदायिक काम गर्ने अभियानकर्ताको सुरक्षामा गम्भीर चासो प्रकट गरेका हुन् ।

पिलाडी गाविसको बगौरामा सञ्चालन गरिएको अन्तरक्रिया कार्यक्रमको सहजीकरण इन्सेक दैलेख जिल्ला प्रतिनिधिले गरेका थिए ।

प्रहरी चौकी धरमपोखराका अर्सइ भीमबहादुर बस्नेत, महिला विकास अधिकृत विश्वमणी जोशी, पिलाडी गाविस सचिव कर्णबहादुर थापा, दलित महिला सङ्घका जिल्ला अध्यक्ष पार्वती विशुन्के, सामाजिक सेवा केन्द्रका कार्यक्रम संयोजक रत्न बुढा, स्थानीय राजनीतिक दलका प्रतिनिधिलगायत स्थानीय शिक्षक तथा सामाजिक कार्यकर्ताहरूको उपस्थितिमा अभियान्ताको सुरक्षा सवालमा अन्तरक्रिया कार्यक्रम गरिएको थियो ।

अमर सुनार