अपि हिमाल गाउँपालिकामा तिहारमा खाद्यान्न अभाव

  ०७४ असोज २४ गते

दार्चुलाको अपि हिमाल गाउँपालिकामा तिहारको मुखमा खाद्यान्न अभाव भएको छ । यो क्रम तिहारसम्मै लम्बिने पक्कापक्की रहेको बताइएको छ । नेपाल खाद्य संस्थान अञ्चल कार्यालय धनगढीले समयमै खाद्यान्न ढुवानी गर्न नसक्दा अपि हिमाल गाउँपालिकामा खाद्यान्न अभाव हुने भएको हो ।

दसैँमा समेत चामल नपाएका अपि हिमाल गाउँपालिकाबासीले तिहारमा झनै अभाव झेल्ने भएका छन् । 'दसैँमा एक अर्कासँग मागेर दसैँ मनाएका छौँ ।'-अपि हिमाल गाउँपालिका-४ का स्थानीय कल्यानसिंह बोहराले भने-'तिहार अगावै चामल नपुग्ने हो भने तिहार खल्लो हुने अवस्था छ ।'

खाद्य संस्थानले यस वर्षदार्चुलाको खण्डेश्वरी डिपोको लागि चामल ढुवानी नगर्दा स्थानीयले समस्या झेल्नु परेको हो । 'गाउँपालिकाभर खानलाई समेत चामल छैन ।'-उनले भने । व्यापारिक प्रयोजनका लागि ल्याइएको चामल अति नै महङ्गो हुँदा सर्वसाधारणले किन्नै नसक्ने अवस्था छ ।

अपि हिमाल गाउँपालिकाले तीन महिना अघि नै खाद्य संस्थान धनगढीलाई चामल ढुवानी गर्न अनुरोध गरेपनि हालसम्म ढुवानी नगरेको अपि हिमाल गाउँपालिकाका अध्यक्ष धर्मानन्द मन्यालले बताए ।

अपि हिमाल गाउँपालिकामा खेतबाट उत्पादित अन्नले तीन महिनासम्म मात्रै पुग्छ । बाँकी समय व्यापारी र खाद्य संस्थानको चामलबाट छाक टार्नुपर्ने अवस्था छ । अपि हिमाल गाउँपालिकामा चामल भन्दा नुन महङ्गो छ । चामल ४० देखि ५० रुपियाँ प्रतिकिलोग्राम पाइएपनि नुन ६० देखि ८० रुपियाँ प्रतिकिलो खानुपर्ने बाध्यता छ । सदरमुकाम खलङ्गाबाट दुई दिनको दुरीमा पुगिने अपि हिमाल गाउँपालिकामा सडक सञ्जालमा जोडिन नसक्दा महङ्गो खाद्यान्न र अभाव झेल्नुपरेको हो । गाउँपालिकाले १० हजार क्वीन्टल खाद्यान्न माग गर्दा पनि ढुवानी गरिएको छैन ।

यसैबिच व्यासको सुनसेरा डिपो र अपि हिमाल गाउँपालिकाको खण्डेश्वरी डिपोको लागि खाद्यान्न डिपो गर्न ताकेता भएको छ । अपि हिमाल गाउँपालिका र व्यास गाउँपालिकामा खाद्यान्न अभाव सिर्जना भएपछि आपूर्ति मन्त्रालयबाटै ताकेता भएको हो ।

आपूर्ति मन्त्रालयले असोज २२ गते नेपाल खाद्य संस्थान भद्रकाली काठमाडौँलाई दार्चुलाको दुई ओटै डिपोमा ३/३ हजार क्वीन्टल खाद्यान्न ढुवानी गर्न ताकेता गरेको हो । गाउँपालिकाको माग अनुसार जिल्ला प्रशासन कार्यालयको परिपत्रको आधारमा मन्त्रालयले ताकेता लगाएको जनाएको छ । मन्त्रालयका शाखा अधिकृत शकुन्तला राईले तत्काल खाद्यान्न आपूर्ति गर्न परिपत्र गरेको बताएकी छन् ।

अपि हिमाल गाउँपालिकामा खाद्यान्न नहुँदा तिहार मनाउनै मुस्किल हुने भएकाले सो ताकेता गरेको मन्त्रालयले जनाएको छ । दार्चुलाका प्रमुख जिल्ला अधिकारी जनार्दन गौतमले समेत खाद्यान्न ढुवानी तथा नुन डिपो स्थापना गर्न मन्त्रालयलाई अनुरोध गरिएको बताए । जनताले महङ्गो मूल्यमा नुन खाइरहेको अवस्थाको अन्त्य गर्न नुन डिपो स्थापना गर्न भनिएको र खाद्यान्न पनि तिहार अगावै बन्दोबस्त गर्न अनुरोध गरिएको उनले जानकारी दिए ।

यस्तै अपि हिमाल गाउँपालिकाका अध्यक्ष धर्मानन्द मन्यालले खाद्य संस्थान अञ्चल कार्यालय धनगढीलाई तिहार अघि नै खाद्यान्न ढुवानी गर्न आग्रह गरेको बताए । तिहार अघि नागरिकलाई खाद्यान्न पुर्‍याउने गरी व्यवस्था मिलाउन ताकेता गरिएको उनले बताए ।

खाद्य संस्थान अञ्चल कार्यालय धनगढीका निमित्त प्रमुख गङ्गादत्त पन्तले पनि सबै क्षेत्रबाट खाद्यान्न ढुवानी हुनुपर्ने माग आइरहेको बताए । अपि हिमाल गाउँपालिकाको खण्डेश्वरी डिपो र व्यास गाउँपालिकाको सुनसेरा डिपोको लागि टेण्डर आह्वान गरिएपनि लागत अनुमानभन्दा बढिको कोटेशन परेपछि पहिलो चरणमा रद्ध गरिएको जनाइएको छ ।

'अहिले तिहारको लागि सुनसेरा डिपोमा १ हजार ५ सय हाराहारीमा खाद्यान्न ढुवानी भइरहेको छ ।'-जोशीले भने-'पुरानै निर्माण व्यवसायीमार्फत ढुवानी व्यवस्थापन मिलाइएको हो ।' सुनसेरा डिपोको लागि एक ट्रक खाद्यान्न आइसकेको छ भने सोमबार मात्र एक ट्रक खाद्यान्न लोड भइरहेको अञ्चल कार्यालयले जनाएको छ ।


नरेन्द्रसिह कार्की