अपाङ्गमैत्री मतदानस्थल निर्माण गर्न माग

  ०७४ जेठ २० गते

जिल्ला अपाङ्ग सङ्घ बैतडीले तोकिएका मतदानस्थलहरू अपाङ्गमैत्री बनाउन माग गरेको छ । ०७४ असार १४ गते हुन लागेको स्थानीय तह निर्वाचनमा अपाङ्गता भएका व्यक्तिहरूको अधिकार सुनिश्चितताका लागि मतदानस्थलहरू अपाङ्गमैत्री बनाउन माग गरिएको हो ।

जिल्लामा १ सय २० मतदानस्थलहरू छन् । जसमम्ये एउटा मतदानस्थल मात्रै अपाङ्गमैत्री रहेको जिल्ला निर्वाचन कार्यालयले जनाएको छ । जिल्ला निर्वाचन कार्यालयका प्रमुख माधवप्रसाद फुँयालका अनुसार जिल्लाको दशरथचन्द नगरपालिका-१ गुरुखोलामा मात्रै अपाङ्गमैत्री मतदान स्थल रहेको हो ।

अशक्त तथा अपाङ्गता भएका व्यक्तिलाई मतदान गर्न सहज बनाउने उद्देश्यले उक्त मतदानस्थललाई यसअघि भएको संविधानसभा निर्वाचनदेखि नै अपाङ्गमैत्री मतदान केन्द्र निर्धारण गरिँदै आएको थियो । उक्त मतदानस्थलमा साविकको गुरुखोला गाविसका १, २ र ३ नं वडाका गरी ४ सय ५१ मतदाता छन् ।

अन्य जिल्लाका १ सय १९ मतदात केन्द्र भने अपाङ्गमैत्री छैनन् । अपाङ्गमैत्री मतदानस्थलमा अपाङ्गता भएका व्यक्तिलाई मतदान गर्ने स्थानसम्म नै हृविलचियर लैजान सकिने, दृष्टिविहीन, शारीरिक अपाङ्गता, बौद्धिक अपाङ्गता, बहिरा, व्यक्तिलगायतलाई सहयोग पुर्‍याउन स्वयम्सेवक र सुरक्षाकर्मीको व्यवस्था गरिएको निर्वाचन कार्यालयले जनाएको छ ।

'अपाङ्गता भएका व्यक्तिहरूको मतदान अधिकार सुनिश्चित गर्न अन्य मतदानस्थलहरूलाई पनि अपाङ्गमैत्री बनाउनुपर्छ ।'-जिल्ला अपाङ्ग सङ्घ बैतडीका उपाध्यक्ष लक्ष्मी बिष्टले भने ।

स्थानीय तहको निर्वाचनका लागि जिल्लामा १ सय २० मतदानस्थलमा १ सय ७४ मतदान केन्द्र तोकिएका छन् भने निर्वाचनमा भाग लिन १३ दल दर्ता भएका छन् । चार नगरपालिका र ६ गाउँपालिका रहेका बैतडीमा १ लाख २४ हजार ८ सय २४ जना मतदाता छन् ।


नरी बडु