अपाङ्गतासम्बन्धी लक्ष्य पूरा गर्नुपर्नेमा जोड

  ०७४ पुस ३ गते

दिगो विकासले अवलम्बन गरेको अपाङ्गताको अधिकारसम्बन्धी लक्ष्यलाई पूरा गर्न सरकार र निजी क्षेत्रको सहयोग आवश्यक रहेको सरोकारवालाले बताएका समाचार राससले जनाएको छ ।

२६ औँ अन्तर्राष्ट्रिय अपाङ्गता दिवसका अवसरमा महिला बालबालिका तथा समाजकल्याण मन्त्रालय, राष्ट्रिय अपाङ्ग महासंघ, युएनडिपीलगायतका संस्थाले मङ्सिर ३ गते आयोजना गरेको ‘अपाङ्गता र दिगो विकाससम्बन्धी दुईदिने राष्ट्रिय सम्मेलन’का वक्ताले अपाङ्गता भएका  व्यक्तिलाई देशको मूल प्रवाहमा लैजान दिगो विकास लक्ष्यले अवलम्बन गरेको लक्ष्य पूरा गनुपर्ने बताएका हुन् ।

सन् २०१५ सेप्टेम्बरमा संयुक्त राष्ट्र संघले सन् २०३० सम्म पालना गरिसक्नुपर्ने भन्दै १५ वर्षीय दिगो विकाससम्बन्धी १७ बुँदा लक्ष्य सार्वजनिक गरेको थियो । जसमा नेपालपक्ष राष्ट्र भएका कारण अपाङ्गताको सवालमा गुणस्तरीय शिक्षा, आर्थिक वृद्धि, न्यून असमानता, दिगो शहर र समानता र सबै लक्ष्यका लागि साझेदारीलाई समावेश गरेको थियो ।

कार्यक्रममा महिला, बालबालिका तथा समाज कल्याण मन्त्री विक्रमबहादुर थापाले अपाङ्गता भएका व्यक्तिको अधिकार सुनिश्चित गर्ने कार्यमा मन्त्रालयले तदारुकताका साथ काम गरिरहेको बताए ।


अनलाइन डेस्क