अनुगमन नहुँदा अवैध औषधिहरूको विक्री हुने गरेको आरोप

  ०७३ भदौ ११ गते

सुदूरपश्चिमका सबै नौ ओटै जिल्लामा खुलेका औषधि पसलहरूको अनुगमन नगरिएका कारण गत आर्थिक वर्षको तथ्याङ्क अनुसार सुदूरपश्चिमभर अवैध औषधि विक्री वितरण गरेको अधिकारकर्मीहरूले आरोप लगाएका छन् ।

मानव स्वास्थ्यका लागि भन्दै खोलिएका १ हजार ३ सय ७१ ओटा औषधी पसलबाट अवैध औषधि विक्री वितरण भइरहेको उनीहरूले आरोप लगाएका हुन् ।

त्यस्ता पसलहरूको अनुगमन गर्ने जिम्मा पाएको औषधि व्यवस्था विभाग नेपालगञ्जले केही वर्षदेखि अनुगमन नै नगरेको जनाएको छ । अनुगमन गर्ने निकायले अनुगमन नगर्दा अधिकांश औषधि पसलहरूले बढी मुल्यमा औषधी विक्री गर्ने गरेको मानवअधिकारकर्मी प्रेम साउदको आरोप छ ।

सरकारले मान्यता दिएका औषधिहरू बेच्नको लागि सञ्चालन अनुमतिपत्र दिएको औषधि व्यवस्था विभाग नेपालगञ्जका फार्मेसी निरिक्षक पुष्प रानाले जानकारी दिए । कार्यालयमा कर्मचारी अभावमा अनुगमन गर्न नसकिएको समेत रानाले बताए ।

औषधि व्यवस्था विभागका प्रमुख औषधि व्यवस्थापक नारायणप्रसाद ढकालले औषधि पसलहरूले त्यस्ता औषधिहरू अवैध तरिकाले बेच्न नपाइने थाहा हुँदाहुँदै औषधि पसलेहरूले विक्री गरिरहेको बताएका छन् ।

उनका अनुसार गर्भपतन गराउने औषधि विक्रीको लागि औषधि पसलले स्वास्थ्य सेवा विभागको सिफारिसमा औषधि व्यवस्था विभागबाट अनुमति लिनु पर्ने हुन्छ । सबै कुराको जानकारी हुँदाहुँदै पनि अनुगमन प्रक्रियासमेत सम्बन्धित निकायले अगाडि बढाउन सकेको छैन् ।

फुटकर औषधि विक्री गर्ने पसलहरू सेती अञ्चलमा ९ सय ५४ र महाकाली अञ्चलका जिल्लाहरूमा ४ सय १७ ओटा सञ्चालनको लागि दर्ता भएको औषधि व्यवस्था विभाग नेपालगञ्जको तथ्यङकमा उल्लेख गरिएको छ । जिल्लागत रूपमा सबैभन्दा बढी कैलालीमा ७ सय १७ ओटा त्यस्ता पसलहरू खुलेका छन् भने सबैभन्दा कम दार्चुलामा १७ ओटा मात्रै रहेका छन् ।


भुपेन्द्र विष्ट