अधिकारी हत्या घटनासम्बन्धी बहस आज दोश्रो दिन पनि जारी

  ०७३ असोज १० गते

गोरखा जिल्ला फुजेल गाविसका कृष्णप्रसाद अधिकारीको हत्या घटना सम्बन्धमा चितवन जिल्ला अदालतमा असोज १० गते दोश्रो दिन पनि बहस भएको छ । जिल्ला अदालतमा असोज ९ गतेबाट सुरु भएको बहस आज दोश्रो दिन पनि जारी रहेको अदालतले जनाएको छ ।

असोज १० गते प्रतिवादी तर्फा आठ जना अधिवक्ताले बहस गरेका थिए । पाँच जना अधिवक्ता बहसका लागि बाँकी नै रहेकाले असोज ११ गते मात्र यस घटनाको टुङ्गो लाग्ने बताइएको छ ।

असोज ९ गते दुइ जना सरकारी वकिलसहित जाहेरवालाको तर्फबाट थप सात जनाले बहस गरेका थिए ।

२०६१ जेठ २४ गते नन्दप्रसाद अधिकारीले आफ्नो छोराको हत्या भएको भन्दै जिल्ला प्रहरी कार्यालय चितवनमा जाहेरी दिएका थिए । त्यसको एक वर्ष ६ महिनापछि कृष्णप्रसादका दाजु नुरप्रसाद अधिकारीले १३ जनाविरुद्ध किटानी जाहेरी दिएका थिए ।

तत्कालीन नेकपा माओवादीका कार्यकर्ताले २०६१ जेठ २४ गते कृष्णप्रसादको अपहरण गरी हत्या गरेका थिए ।

छोरा कृष्णप्रसादको हत्यारालाई कारबाहीको माग गर्दै झण्डै ६ वर्षादेखि अनसनरत आमा गङ्गामायाले गत भदौ २७ गते मात्र अनसन तोडेकी थिइन् । चितवन जिल्ला अदालतका श्रेष्तेदार सहितको टोलीले असोज २ गते वीर अस्पतालमै पुगेर गङ्गामायासँग बयान लिएको थियो ।


दिपेन्द्र अधिकारी