अधिकारको प्रत्याभूति नभएको अपाङ्गता व्यक्तिको गुनासो

  ०७४ चैत २९ गते

रुकुम पश्चिमका अपाङ्गता भएका व्यक्तिले आफूहरूलाई अधिकारको प्रत्याभूति नभएको गुनासो गरेका छन् । अपाङ्गता भएका व्यक्तिले आफूहरू अझै पनि शिक्षा, स्वास्थ्य, रोजगारी लगायतका सेवाबाट वञ्चित हुनुपरेको अपाङ्गता संरक्षण मञ्चका अध्यक्ष भिमबहादुर डाँगीले गुनासो गरेका हुन् ।

अपाङ्गता भएका व्यक्तिलाई समाजमा हेर्ने दृष्टिकोणमा परिवर्तन नआएको, स्थानीय तहबाट लक्षित बजेट विनियोजनमा कन्जुस्याई गरेको, अपाङ्गमैत्री संरचना निर्माण नभएको, सवारी साधनमा यात्रा गर्दा छुटको व्यवस्था नगरेको उनीहरूले गुनासो गरेका छन् ।

मुसिकोट नपा-२ का धनबहादुर खड्काले नगरपालिकामा आफूहरू कार्यक्रम माग गर्न जाँदा सबै बजेट विकास निर्माणका लागि मात्र विनियोजन गरेको र अपाङ्गता क्षेत्रको थोरै बजेट पनि आफू अनुकूलको व्यक्ति र समूहलाई दिएको थाहा पाउँदा दुःख लागेको भन्दै गुनासो गरे ।

कतिपय अपाङ्गता नभएका व्यक्तिले समेत भत्ता लिइरहेको सुन्नमा आएको हुँदा त्यस्ता व्यक्तिलाई छानबिन गरी कारबाही गरिने जिल्ला समन्वय समिति रुकुम पश्चिमका उपप्रमुख इन्दिरा बुढामगरले बताइन् ।

अपाङ्गता क्षेत्रमा काम गर्नका लागि स्थानीय तहमा बजेट व्यवस्था गर्न सकिने भएकाले त्यसका लागि आफूले पहल गर्ने उनको भनाई छ । त्यस्तै मुसिकोट नगरपालिकाका उपप्रमुख प्रेमकुमारी सुनार केसीले कहिँकतै अपाङ्गता भएका व्यक्तिलाई दुर्व्यवहार, हेला गरेको र अन्य अधिकारको हनन्का घटना भएमा कारबाही गरिने बताइन ।

राष्ट्रिय जनगणना २०६८ अनुसार रुकुमको जनसङ्ख्या २ लाख ८ हजार ५ सय ६७ रहेको छ । रुकुममा ५ हजार ९ सय २२ जनामा अपाङ्गता रहेको तथ्याङ्क विभागले जनाएको छ ।


मनिषा केसी