अज्ञात रोगका कारण आठ जनाको मृत्यु, १२ जनाभन्दा बढी बिरामी

  ०७६ वैशाख १४ गते

अज्ञात रोगका कारण हुम्लाको ताँजाकोट गाउँपालिकामा आठ जनाको मृत्यु भएको छ भने १२ जना भन्दा बढी बिरामी परेका छन् ।

बिरामीको उचित उपचार र रोगको पहिचान नभएका कारण रोग फैलिँदै आएको छ । रोगबाट ताँजाकोट गाउँपालिका मैला, मदानलगायतका गाउँमा दर्जनौँ बिरामी परेको सो गाउँपालिका अध्यक्ष बागदल मल्लले बताए ।

सुरूमा बिरामीको टाउको दुख्ने, वाकवाकी लाग्ने, छाती दुख्ने, ज्वरो आउने र अन्त्यमा मृत्यु हुने गरेको अध्यक्ष मल्लको भनाई छ ।

ग्रामीण भेगमा रहेका स्वास्थ्य संस्थामा औषधि नहुनुका साथै स्वाथ्यकर्मी नबस्नुकै कारणले उपचारमा समस्या हुँदै आएको स्थानीय नन्दलाल शर्माले बताए ।

एक हप्ताअघि पानी परेसँगै अज्ञात रोग फैलिएपछि मृत्यु हुनेमा ताँजाकोट गाउँपालिका–१ का ७० वर्षीया कुशुमा रिठाल र ६० वर्षीय सुरजित खड्का रहेका छन् ।

त्यस्तै सोही गाउँपालिका–२ का ५५ वर्षीय रङ्गे कोली र पाँच वर्षीया सुनकेस्रा सुनार, वडा नम्बर ३ की ७० वर्षीया अम्मकली मल्ल, ७५ वर्षीय बज्जीरे सुनार, ५५ वर्षीय लक्ष्य सुनार र १० महिनाका बालक सञ्जिव थापा रहेको मैला स्वास्थ्य चौकीका अहेब मोतीलाल जैशीले बताए ।

स्वास्थ्य चौकीमा पर्याप्त मात्रामा औषधि नभएको र स्वाथ्यकर्मी स्वाथ्य चौकीमा नबसेकै कारणले गाउँमा बिरामीको सङ्ख्या बढेको गाउँपालिका अध्यक्ष बागदल मल्लले बताए । मृत्यु हुने सबैको श्वासप्रश्वास र दमसम्बन्धी समस्या रहेको उनको भनाइ छ ।

घटनास्थल सदरमुकाम सिमकोटदेखि ४५ कोष टाढा भएकाले के रोगका कारणले ज्यान गएको हो भन्ने जानकारी नभएको प्रमुख जिल्ला अधिकारी धोलकराज ढकालले बताए ।

औषधि र स्वास्थ्यकर्मीको अभाव हुन नदिन र उक्त रोगको रोगथामका लागि प्रदेश सरकार सामाजिक विकास मन्त्रालयबाट औषधिसहित स्वास्थ्यकर्मीको टोली घटना स्थलमा जाने तयारी भइरहेको गाउँपालिकाका अध्यक्ष मल्लले बताए ।


नन्द सिंह