अज्ञात पक्षबाट स्काभेटरमा आगजनी, सेनाद्वारा शङ्कास्पद वस्तु डिस्पोज

  ०७६ असार ३ गते

सोलु खोला–दूधकोशी हाईड्रोपावर ८६ मेगावाट निर्माणाधीन क्षेत्रमा अज्ञात पक्षले एउटा स्काभेटरमा आगजनी गरेको छ ।

सोलु दूधकुण्ड नगरपालिका–११ भदौरे स्थित पावर हाउस निर्माण क्षेत्रमा रहेको स्काभेटरमा अज्ञात पक्षले जेठ ३२ गते राति आगजनी गरेको सो हाइड्रो पावर निर्माण कम्पनी साहस ऊर्जाका निर्देशक हिम पाठकले बताए ।

घटना जेठ ३२ गतेको भएपनि दूरदराजमा भएकाले असार १ गते मात्र आगजनी बारे थाहा भएको निर्देशक पाठकले बताए ।

त्यसैगरी आगजनीस्थलबाट १५ मिनेटको दुरीमा फेला परेको शङ्कास्पद वस्तु नेपाली सेनाको बम डिस्पोजल टोलीले असार २ गते डिस्पोज गरेको छ ।

उदयपुरबाट नेपाली सेनाको टोली दुई दिनको पैदल यात्रा गरी शङ्कास्पद वस्तु फेला परेको क्षेत्रमा असार २ गते पुगेपछि डिस्पोज गराएको जिल्ला प्रहरी कार्यालय सोलुखुम्बुका इन्स्पेक्टर उत्तम कार्कीले बताए ।

प्रेसर कुकुरमा विष्फोटक पदार्थ राखी ब्लाष्ट गराउने उद्देश्यले राखिएको बम नेपाली सेनाको डिस्पोजल टोलीले निष्क्रिय बनाएको इन्स्पेक्टर कार्कीको भनाई छ ।

यसैबीच प्रहरीले आगजनी र शङ्कास्पद वस्तु राखेको आशङकामा अनुसन्धानका लागि गिरफ्तारीमा परेका दुई जनालाई असार २ गते छाडिएको जनाएको छ ।

अनुसन्धानका लागि गिरफ्तारीमा परेका नेचा सल्यान गाउँपालिका–२ का ३० वर्षीय भूपेन्द्र कार्की र सोही ठाउँका ३४ वर्षीय प्रकाश बस्नेतलाई आवश्यक सोधपुछ पछि असार २ गते छाडिएको इन्स्पेक्टर कार्कीले बताए ।


भोजराज कार्की