अज्ञात पक्षबाट प्रेसर कुकर बम विष्फोट, घरमा क्षति मोटरसाइकलमा आगजनी

  ०७६ जेठ २५ गते

तुर्माखाँद गाउँपालिका–३ भैरवस्थानको असराघाटमा रहेको माथिल्लो कर्णाली जलविद्युत निर्माणकर्ता जिएमआरको सम्पर्क कार्यालय नजिक अज्ञात पक्षबाट जेठ २४ गते राति प्रेसर कुकर बम बिष्फोट र मोटरसाइकलमा आगजनी गरिएको छ । स्थानीय दिपक बिसीको घर भाडामा लिएर जिएमआर कम्पनीले सम्पर्क कार्यालय स्थापना गरेको छ ।

विष्फोटनले बिसीको शौचालयमा पूर्णरूपमा क्षति भएको छ भने घर चर्केको छ । सोही घरमा राखेको घरधनीको भे ७ प ९६९८ नम्बरको मोटरसाइकलमा आगजनी गरिएको छ ।

जिएमआरको सम्पर्क कार्यालयमा भने कुनै क्षति नभएको जिल्ला प्रहरी कार्यालयका डिएसपी जनकबहादुर शाहीले जानकारी दिए ।

अज्ञात पक्षले राति करिब २ बजेर ३० मिनटमा असराघाटमा रहेको दिपक बिसीको ढुङ्गामाटोले बनेको तीनतले घर नजिक बम विष्फोटन गरिएको अछाम प्रहरीले पुष्टि गरेको छ ।

जिएमआर कम्पनीको सम्पर्क कार्यालयलाई लक्षित गरेर बम विष्फोट गरिएको हुनसक्ने अछाम प्रहरीले अनुमान गरेको छ । घटना कसले गराएको हो भन्ने बारेमा एकिन हुन सकेको छैन ।

घटनामा संलग्न समूहको खोजीमा अछाम प्रहरीले सदरमुकाम मङ्गलसेनसहित इलाका प्रहरी कार्यालय, कमलबजार, विनायक र भैरवस्थान तुर्माखाँद र बेलखेतबाट प्रहरी परिचालन गरेको छ ।


शिवराज ढुङ्गाना