अज्ञात पक्षद्वारा स्वास्थ्य चौकी तोडफोड

  ०७७ कात्तिक २२ गते

त्रिपुरासुन्दरी नगरपालिका–१ त्रिपुराकोटमा रहेको स्वास्थ्य चौकीमा कात्तिक २० गते राती अज्ञात पक्षले तोडफोड गरेको छ ।

स्वास्थ्य चौकीको स्टोर कोठा, इन्चार्जको कोठा, भान्सा, मुल कोठा र सभा हल समेत गरी पाँच कोठाको ताला फोडेर औषधि लगायतका अन्य सामग्रीहरू चोरी गरेकोे प्रहरी चौकी त्रिपुराकोटका सई तेजबहादुर रानाले इन्सेक प्रतिनिधिलाई बताउनु भयो ।

स्वास्थ्य चौकी इन्चार्ज दशैं मनाउन जुम्ला गएको र कार्यालय सहायक समेत घरमा बसेको मौका छोपी स्वास्थ्य चौकी तोडफोडका साथै चोरी भएको र इन्चार्ज नआएसम्म क्षतिको यकिन गर्न नसकिने सई रानाको भनाइ छ ।

स्वास्थ्य चौकी व्यवस्थापन समितिका अध्यक्ष तथा त्रिपुरासुन्दरी नपा– १ का वार्ड अध्यक्ष कर्मसिङ थापाले कर्मचारी कोही नभएको मौका छोपी तोडफोडका साथै चोरी भएको बताउनु भयो ।

घटनाको बारेमा अनुसन्धान भइरहेको प्रहरीको भनाइ छ ।

Dolpa 20200711


विष्णुप्रसाद देवकोटा