अज्ञात पक्षद्वारा वडा कार्यालयमा आगजनी

  ०७६ असार ४ गते

अज्ञात पक्षले छत्रेश्वरी गाउँपालिका-३ स्थित वडा कार्यालयमा असार २ गते राति आगजनी गर्दा कार्यालयका सबै सामान जलेर नष्ट भएका छन् ।

आगजनीबाट कार्यालयमा रहेका कागजपत्र, ल्यापटप, कम्पुटर, फोटोकपी मेशिन, सोलार प्यानल, कुर्सी, कार्पेटलगायत सम्पुर्ण सामान जलेर नष्ट भएको वडा अध्यक्ष राजबहादुर बुढाथोकीले जानकारी दिए ।

आगजनीको सूचना पाएपछि घटनास्थलमा इलाका प्रहरी कार्यालय, लुहामबाट इन्स्पेक्टर नरबहादुर खड्काको नेतृत्वमा प्रहरी टोली पुगेर प्रहरी र स्थानीयबासीले आगो नियन्त्रणमा लिएका थिए ।

घटनापछि प्रमुख जिल्ला अधिकारी सहितको टोलीले घटनास्थलको अनुगमन गरेको र घटनामा संलग्नहरूको खोजी कार्य जारी रहेको जिल्ला प्रहरी कार्यालय सल्यानका, डिएसपी श्यामबहादुर खत्रीले जानकारी दिए ।

प्रतिनिधिसभाको असार ४ गतेको बैठकमा सांसद टेकबहादुर बस्नेतले यससम्बन्धमा सदनमार्फत सरकारको ध्यानाकर्षण गराएका छन् ।


मिना बुढाथोकी