अज्ञात पक्षद्वारा वडा कार्यालय तोडफोड

  ०७७ मङ्सिर ६ गते

त्रिपुरासुन्दरी नगरपालिका–१ को वडा कार्यालयमा मङ्सिर ५ गते राति अज्ञात पक्षले तोडफोड गरेको छ ।

वडा कार्यालयको ढोका र झ्याल तोडफोड गरी प्रवेश गरेको अज्ञात पक्षले कार्यालयको एक थान डेस्कटप कम्प्युटर र कार्यालयको निर्णय पुस्तिका चोरी गरेको प्रहरी चौकी त्रिपुराकोटका असई दिपक केसीले बताउनु भयो ।

कसले र किन वडा कार्यालयको ढोका र झ्याल तोडफोड गरी कार्यालय सामग्री चोरी गर्यो‍ भन्ने बारे अनुसन्धान भइरहेको पनि असई केसीले बताउनु भयो ।

वडा अध्यक्ष कर्मसिं थापाले कार्यालयबाट अज्ञात पक्षले चोरी गरेर लगेको कम्प्युटर र रजिष्टार कार्यालय भन्दा झण्डै २ सय मिटरको दुरीमा रहेको गल्लीगाड खोलाको किनारमा भेटिएको बताउनु भयो ।

डेस्कटप कम्प्युटर र रजिष्टार लगेर खोलाको किनारमा फालिएको अवस्थामा भेटिएपनि अन्य कुनै पनि कार्यालय सामग्री चोरी नभएको पनि वडा अध्यक्ष थापाले जानकारी दिनु भयो ।

गत असोजको दोस्रो साता पनि अज्ञात पक्षले त्रिपुराकोट स्वास्थ्य चौकीका पाँच कोठामा ताला फोरेर केही औषधि चोरी गरेको थियो ।


विष्णुप्रसाद देवकोटा