अख्तियारका निलम्बित प्रमुख कार्की सर्वोच्चमा उपस्थित भएपनि सुनुवाइ स्थगित

  ०७३ मङ्सिर १६ गते

सर्वोच्च अदालतले दिएको तारेख बुझ्न अख्तियारका निलम्बित प्रमुख लोकमानसिंह कार्की अदालतमा उपस्थित भएपनि उनीमाथि दायर भएको मुद्दाको सुनुवाइ भने स्थगित भएको छ ।

अदालतले कार्की पक्षका वकिल बालकृष्ण न्यौपाने उच्च रक्तचापको कारण अदालतमा उपस्थित नभएको कारण देखाउँदै मङ्सिर १६ गते हुने भनिएको कार्कीविरूद्धको सुनुवाई पेशी सारिएको हो ।

सर्वोच्चका न्यायाधीश जगदीश शर्मा पौडेल, इश्वरप्रसाद खतिवडा र आनन्दमोहन भट्टराईको पूर्ण इजलासले कार्कीविरूद्धको सुनुवाइ पेशी अब सार्न नमिल्ने गरी अर्को पेशी पुस ७ गतेका लागि तोकेको जनाएको छ । सर्वोच्च अदालतमा अब हुने सुनुवाइमा निवेदक वा विपक्षी कुनैपनि पक्षको अनुरोधमा पेशी स्थगित नहुने जनाएको छ ।

निलम्बित अख्तियार प्रमुख कार्कीमाथि नियुक्तिको योग्यता, सेवा सुविधा खोस्न माग गर्दै र अदालतको अवहेलना र उनका समर्थकले अदालतको म्याद तामेलीमा गरेको अबरोध लगायतका सात ओटा मुद्दा सर्वोच्चमा दायर भएको छ ।


विवेक ढुङ्गाना